«Муһапизәтчи гезити: «гүзәллик салонлири, кийим мода мусабиқилири хитайниң уйғур мәдәнийитини йоқитиш шәкиллиридур»

Мухбиримиз әркин
2019-10-21
Елхәт
Пикир
Share
Принт

Әнгилийәниң «муһапизәтчи гезити» 20‏-өктәбир уйғур һәққидә тәһрират мақалиси елан қилип, хитайниң уйғурларни һәр хил усуллар билән бастуруватқанлиқи, райондики мода кийим көргәзмилири, гүзәллик салонлири вә бағчилар уйғур мәдәнийитини йоқитишниң бир хил усули икәнлики, шуңа бу хил усулларға диққәт қилиш керәкликини билдүргән. Мақалидә, шинҗаңдики бир милйон уйғур вә башқа мусулманлар лагерларға қамилип, мәҗбурий әмгәккә селиниватқанлиқи һәққидики доклатлар көпләп оттуриға чиққан бир мәзгилдә мода кийим көргәзмилиригә, гүзәллик салонлириға яки бағчиларға диққәт қилишниң бәк ғәлитә туюлуши мумкинлики, лекин буниң ғәлитә әмәслики тәкитлинип: «бу шәкилләр хитайниң уйғур мәдәнийитини йоқитиш урунушиниң бир парчиси. Йеқинқи тәтқиқатларда һөкүмәтниң уйғур аяллириниң қияпитини өзгәртиватқанлиқи тәпсилий көрситип берилмәктә. 2011‏-Йили ‹гүзәллик қурулуши' дегән намда башланған һәрикәттә, аяллар ниқаб вә һиҗапни ташлашқа риғбәтләндүрүлүп, қисқа вақитта сатирашхана вә гүзәллик салонлири рояпқа чиқти» дейилгән.

«Муһапизәтчи гезити» өзиниң «шинҗаң һәққидики қаришимиз: хитайда мәҗбурий әмгәк вә мода кийим көргәзмилири» сәрләвһилик мақалисидә илгири сүрүшичә, хитай һөкүмитиниң мәқсити шу арқилиқ «аялларниң бәдән көрүнүши өзгәртиш, андин уларниң турмуш усули вә пикир қилиш услубини өзгәртиш» икән.

Мақалидә йәнә трамп һөкүмитиниң йеқинда 28 хитай ширкити вә йәрлик җ х оргинини қара тизимликкә киргүзгәнлики һәм виза имбаргоси қойғанлиқи тәкитлинип, «кишиләр президент трампниң мусулманлар һәққидики сөзи вә кишилик һоқуқ мәсилисидики позитсийәси сәвәблик униң бу һәрикитигә гуман билән қарисиму, лекин нурғун дөләтләр шинҗаңда йүз бериватқан ишларға көз юмувалған бир мәзгилдә униң бу һәрикити йәнила алқишлашқа әрзийду. Мусулман дөләтләр хитайниң мәблиғини, дәп қаттиқ номуссизлиқ қилмақта. Әнглийә, германийәк японийәни өз ичигә алған бәзи дөләтләр инкас билдүргән болсиму, лекин бесим ишлитишкә истәксизлик қилмақмат. Буниң үчүн чоқум техиму көп ишлар қилиниши керәк» дейилгән.

Пикирләр (0)
Share
Толуқ бәт