Uyghur diyaridiki kömür bayliqining xitaygha toshulushi hessilep ashmaqta

Washin'gtondin muxbirimiz eziz teyyarlidi
2024.06.05

Xitay bashqurushidiki “Shinjang géziti” ning 4-iyundiki xewiride éytilishiche, 2024-yili may éyining axirigha qeder Uyghur diyaridiki tömüryol liniyesi arqiliq xitay ölkilirige toshulghan kömürning miqdari 35 milyon tonnadin ashqan. Bu san aldinqi yildiki toshush sewiyesige sélishturghanda, 50 pirsentke yéqin köpeygen.

Xewerde éytilishiche, yéqinqi yillardin buyan xitay ölkiliride kömürge bolghan éhtiyajning jiddiy éshishi tüpeylidin, Uyghur diyaridiki kömür qézish xizmiti hessilep ashqan. Buning bilen bir pesildila Uyghur diyaridiki kömür qézish miqdari 120 milyon tonnadin éship ketken. Xewerde tömüryol arqiliq kömür yötkigende “Bixeter bolush, yötkesh miqdari zor bolush, bahasi töwen bolush” dégenlerning toluq emelge ashidighanliqi alahide tekitlen'gen. Shuning bilen birge Uyghur diyarida yéqinqi yillarda arqimu'arqidin qurulghan yéngi tömür yol liniyelirining del mushu xildiki “Shinjangning kömürini sirtqa yötkesh” te muhim rol oynighanliqi tilgha élin'ghan. Shuningdek bu xildiki kömür yötkeshning yéqin kelgüside téximu zor kölem alidighanliqi éytilghan.

Emma yéqinqi mezgillerde Uyghur diyaridin igilen'gen türlük uchurlar milyonlighan Uyghur déhqanlirining qishliq issinish mesilisi üchün kömür sétiwélishqimu qurbi yetmeywatqanliqini, shu sewebtin bir qisim a'ililerning téximu zor qerzge boghulup qéliwatqanliqini körsetmekte. Uyghur diyarining néfit, tebi'iy gaz we éléktir quwwitidin bashqa yene bu xildiki kömür yötkesh kölimi öz nöwitide piroféssor pallawi das (Pallavi V. Das)Ning 2016-yili neshir qilin'ghan “Mustemlikichilik, tereqqiyat we muhit” namliq esirini eslitidu. Uningda mustemlikichilerning tömür yol qurushi heqqide toxtilip, “Bu xildiki tömüryollar herqachan mustemlikichi hakimiyetning mustemlike rayonliridin qéziwalghan bayliqlirini téz sür'ette toshushigha xizmet qilidu” dep körsitilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.