Uyghur élide dunyadiki eng chong kömürni asas qilghan métanol monomér türi testiqlan'ghan

“Shinjang géziti” ning 2024-yili 6-ayning 4-künidiki xewirige asaslan'ghanda, xitay hökümiti shinjang chiya cheklik hessidarliq shirkiti guruhining yilliq mehsulat miqdari 6 milyon tonna bolghan métanol monomér türini ishlepchiqirishni testiqlan'ghan. Bu, dunyadiki eng chong kömürni asas qilghan métanol monomér (methanol monomer) ishlepchiqirish türi bolup hésablinidiken. Bu qurulush sherqiy jungghar iqtisadiy rayonida qurulidighan bolup, xitay hökümiti buning üchün 30 milyard yüen meblegh salidiken.

Mezkur xewerde déyilishiche, bu yil 4-ayning 17-küni, béyjingda mutexessisler shinjang chiya yéngi matériyal cheklik hessidarliq shirkitining yilliq 6 milyon tonna kömürni asas qilghan métanol monomér türini ishlepchiqirish mumkinchilikige a'it tetqiqat doklatini bahalap békitken. Mutexessisler bu türning rayondiki kömür bayliqining ewzellikige tayinidighanliqini we Uyghur rayonning zamaniwi kömür ximiyelik sana'itini ilgiri süridighanliqini ilgiri sürgen. Lékin, bundaq ximiyelik sana'et türlirining bulghinishni kücheytidighanliqimu otturigha qoyulmaqta.

Xitay hökümiti 2023-yildin bashlap, Uyghur diyarida énérgiye ishlepchiqirishni öz ichige alghan “8 Chong kespiy ishlepchiqirish türi” ni yolgha qoyghanidi. Shuningdin buyan, xitayning Uyghur élidiki tebi'iy bayliq menbelirini talan-taraj qilishi téximu ewjige chiqiwatqanliqi bildürülmekte.

Yéqindin buyan, Uyghur diyaridiki kömürni asas qilghan métanol monomérliri, kömür éléktir istansilirining éléktirliri we xam kömür miqdarining ichkiri xitaygha yetküzülüshining shiddet bilen artiwatqanliqi xewer qilinmaqta.

Xitay da'irilirining ichkiri xitayni Uyghur élining éléktir-énérgiyesi, kömür, tebi'iy gaz, néfit menbesi bilen teminlishining künsayin shiddet bilen éshishi Uyghur élining su, tupraq we hawaning bulghinishini öz ichige alghan ékologiyelik buzghunchiliqlargha uchrishini kücheytiwatqanliqi hénri shajéski qatarliq mutexessisler teripidin agahlandurulghanidi.