Корла хәлқи бир яқтин «мәшрәп» ойнап, йәнә бир яқтин «агаһландуруш филими» көрүшкә орунлаштурулмақтикән

Мухбиримиз ирадә
2019-04-12
Елхәт
Пикир
Share
Принт

Бүгүн хитайниң шинхуа агентлиқи уйғур елидики лагер түзүминиң зәрбисигә бир қәдәр еғиррақ учриған районлардин бири болған корлада хәлқ амминиң бирликтә мәшрәп ойниғанлиқиға даир рәсимлик хәвәр тарқатти.

Юқириқи хәвәрдә 10-апрел күни корла хәлқ мәйданида һәр милләт аммисиниң бирликтә усул ойнап, мәшрәп өткүзгәнлики баян қилинған.

Техи йеқиндила уйғурларниң әнәниви норуз байримини өткүзгәнликигә даир бир парчиму хәвәр тарқатмиған хитай һөкүмәт таратқулириниң немә үчүн бирдинла мәшрәпни тилға елип қалғанлиқи диққәт қозғиди.

Чәтәлләрдики уйғур көзәткүчиләрниң қаришичә, йеқиндин буян уйғурларниң хитай әнәниви адәтлири бойичә байрам өткүзгәнлики, хитайчә кийинип яңгир уссули ойниғанлиқидәк тәшвиқат сүрәтлири хәлқарада қаттиқ тәнқидкә учриғанлиқтин улар бу сүрәтлик хәвәр арқилиқ хәлқара җамаәт пикрини тәңшимәкчи болған болуши мумкин икән.

Корлада «һәр милләт аммисиниң хушал-хурам һалда мәшрәп өткүзүватқанлиқи» һәққидики хәвәр билән охшаш вақитта йәнә корла шәһәрлик һөкүмәт торида корладики теббий саһә хадимлириниң бирдәк «агаһландуруш филими» көрүшкә орунлаштурулғанлиқи һәққидики хәвәрму көзгә челиқиду. Көзәткүчиләр буни корладики җиддий сиясий вәзийәтниң техичә өзгәрмигәнликиниң бешарити, дәп қаримақта.

Пикирләр (0)
Share
Толуқ бәт