Korla xelqi bir yaqtin "Meshrep" oynap, yene bir yaqtin "Agahlandurush filimi" körüshke orunlashturulmaqtiken

Muxbirimiz irade
2019-04-12
Élxet
Pikir
Share
Print

Bügün xitayning shinxu'a agéntliqi Uyghur élidiki lagér tüzümining zerbisige bir qeder éghirraq uchrighan rayonlardin biri bolghan korlada xelq ammining birlikte meshrep oynighanliqigha da'ir resimlik xewer tarqatti.

Yuqiriqi xewerde 10-aprél küni korla xelq meydanida her millet ammisining birlikte usul oynap, meshrep ötküzgenliki bayan qilin'ghan.

Téxi yéqindila Uyghurlarning en'eniwi noruz bayrimini ötküzgenlikige da'ir bir parchimu xewer tarqatmighan xitay hökümet taratqulirining néme üchün birdinla meshrepni tilgha élip qalghanliqi diqqet qozghidi.

Chet'ellerdiki Uyghur közetküchilerning qarishiche, yéqindin buyan Uyghurlarning xitay en'eniwi adetliri boyiche bayram ötküzgenliki, xitayche kiyinip yanggir ussuli oynighanliqidek teshwiqat süretliri xelq'arada qattiq tenqidke uchrighanliqtin ular bu süretlik xewer arqiliq xelq'ara jama'et pikrini tengshimekchi bolghan bolushi mumkin iken.

Korlada "Her millet ammisining xushal-xuram halda meshrep ötküzüwatqanliqi" heqqidiki xewer bilen oxshash waqitta yene korla sheherlik hökümet torida korladiki tébbiy sahe xadimlirining birdek "Agahlandurush filimi" körüshke orunlashturulghanliqi heqqidiki xewermu közge chéliqidu. Közetküchiler buni korladiki jiddiy siyasiy weziyetning téxiche özgermigenlikining béshariti, dep qarimaqta.

Toluq bet