Kishilik hoquqni közitish teshkilati bachélétni apet xaraktérlik xitay ziyaritidiki xataliqini tüzitishke chaqirghan

Muxbirimiz erkin
2022.07.13
Share on WhatsApp
Share on WhatsApp

Kishilik hoquqni közitish teshkilatining ikki nopuzliq mes'uli “Shwétsariye uchurliri” torida maqale élan qilip, b d t kishilik hoquq aliy komissari mishél bachélétni ziyankeshlikke uchrighuchilar terepte turup, uning apet xaraktérlik xitay ziyaritidiki xataliqlirini tüzitishke chaqirghan.

Maqalide tekitlishiche, bachélétning bu yil 5-aydiki xitay ziyariti xitayning qorqunchluq kishilik hoquq depsendichilikige qarita dunyaning diqqitini qozghashtiki yaxshi purset bolsimu, biraq u xitayning Uyghurlargha keng kölemlik ziyankeshlik qilishi, tibetlerni basturushi, we xongkongda erkinlikke hujum qilishini tenqid qilishitin özini qachurup, xitay hökümitining depsendichilikni ret qilishigha desmaye sélip bergen.

Kishilik hoquqni közitish teshkilatining xitay ishliri diréktori sofiye richardson bilen amérika ishliri dériktori tamara tarachyuk bronér qelemge alghan mezkur maqalide, xitayning 2014-yilidin bashlap Uyghur we bashqa türkiy xelqlerge qarita insaniyetke qarshi jinayet sadir qilghanliqini, shundaq bolushigha qarimay bachélétning shinjangdiki resmiy ziyariti mezgilide, xitayning “Térorluqqa qarshi küresh” dep süretlep kelgen we tutup turush lagérlirini “Kespiy maharet merkezliri” dep perdazlishidek siyasiy teshwiqatlirigha qarita héchqandaq inkas bildürmigenlikini tenqidligen.

Maqalida mundaq déyilgen: “Hemmidin yamini, bachélét xitaydiki ziyankeshlikke uchrighuchilar we hayat qalghuchilargha qarita héchqandaq adalet ümidini otturigha qoymidi… nomus qilarliqi shuki, u ziyankeshlikke uchrighuchi toplar bilen meslihetliship béqishnimu pilanlimidi.”

Maqalide tekitlishiche, bachélétning wezipe mudditi toshushtin burun uning yenila yaxshi tesirat qaldurush pursiti bar iken. Maqalide uning “Shinjangdiki depsendichilikke da'ir doklatini derhal élan qilishi, xitay hökümitining rayondiki keng kölemlik, omumyüzlük we sistémiliq depsendichilikining mahiyitini éniq sözlishi, barliq gunahsiz tutqun qilin'ghan tutqunlarni qoyup bérishke chaqirishi, Uyghur, tibet teshkilatliri we xitay kishilik hoquq qoghdighuchiliri bilen qerellik diyalog qurushi kérekliki” ni bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.