Xitayning dunya boyiche eng chong küntaxta éléktir istansisi ishqa kirishken

Xitayning ürümchi shehiri etrapida qurghan 5 gégawat tok ishlepchiqiralaydighan küntaxta éléktir istansisi 6-ayning 4-küni Uyghur rayonining éléktir torigha ulan'ghan bolup, nöwette dunya boyiche eng chong küntaxta éléktir istansisigha aylan'ghan.

“Ruytérs agéntliqi” ning bu heqte bergen xewirige qarighanda, 200 ming in'giliz mosi kélidighan da'iride qurulghan bu küntaxta éléktir istansisi her yili 7 milyard kilowat sa'etke yéqin tok chiqiridighan bolup, kichikrek bir döletni bir yil teminleshke yétidiken.

Uyghur rayonida qurulghan bu küntaxta éléktir istansisi xitayning ningshya we chingxeyde qurghan küntaxta éléktir istansisi ishlepchiqiralaydighan 3 gégawat tok miqdaridinmu éship ketken.

“Dewr” zhurnilining bu yil 4-ayda élan qilghan xewirige qarighanda, xitay 10 yil burunla dunyadiki küntaxta bazirining 40 pirsentini igiligen bolup, bügünki künde 80 pirsentini igiligen, yeni dunya bazirini asasen monopol qiliwalghan. 2023-Yilning aldinqi yérimida, xitayning küntaxta éksporti 34 pirsent ashqan. Emma buning arqisigha mejburiy emgektin ibaret wehshiy, rezil, qarangghu bir ré'alliq yoshurun'ghan.

Xewerde mundaq déyilgen: “Xitayning quyash énérgiyesi sana'iti xitay kompartiyesining shinjangdiki Uyghur qatarliq az sanliq milletlerge ziyankeshlik qilghanliqi bilen chétishliq, buning ispatliri toluq. Dunyadiki küntaxtilarning yérimi dégüdek Uyghur rayonidin chiqidighan kiristalliq kirimniyini ishlitidu”.