Abdulla gül kurdlar urush toxtitish kélishimige xilapliq qilsa, enqerening buninggha jawab béridighanliqini agahlandurdi

15- Noyabir küni kurdistan ishchilar partiyisining qoralliq guruppiliri  türikiyining sherqiy jenubi qismidiki merdin dégen jayda kétiwatqan türkiye armiyisining herbiy aptomobil etritige oq chiqirish weqesi yüzbergendin kéyin,  bu weqe türkiye hökümiti we jama'iti ichide ghulghula qozghighan idi.

Türkiye prézidénti abdulla gül bu munasiwet bilen söz qilip, eger kurdistan ishchilar partiyisining waqitliq urush toxtitish kélishimi buzsa  türkiye dölitining buninggha  zörür jawablarni béridighanliqini agahlandurdi.

Rusiyining  “Régnum”  torining yézishiche, abdulla gül   “ Men buning tesadipiy we öz ixtiyari bilen bolmighan ish bolushini ümid qilimen,  türkiye  qoralliq küchliri we bixeterlik küchliri her qachan  jengge teyyar halda” dep tekitligen. U sözide yene  “Eger kimki yene qaytidin qoligha qoral alsa, döletning téximu qudretlik qoralliri bar.  Bu melumluq” dep bildürgen  .

Melumki, bu yil mayda p k k ning rehbiri , hazir türkiye türmiside yétiwatqan  abdulla ojalan  p k k gha urush toxtitish chaqiriq qilghan idi. Netijide, ikki terep arisida urush toxtitish weziyiti shekillen'gen idi.
Nöwette, türkiye hökümiti kurdlarning siyasiy, medeniyet we bashqa barliq hoquqlirini qoghdashqa alahide ehmiyet bériwatqan bolup, kurdlarning milliy partiyiliri heriket qilish, téléwiziye programmiliri tarqitish, erkin sözlesh  hoquqigha érishken ,hetta türkiye parlaméntidimu köp sanda kurd parlamént ezaliri bar bolup,  kurdlarning milliy hoquqlirini kapaletke qilish  üchün parlaméntta  telep qoyush we pikir  bayan qilish hoquqigha ige.

Türkiye hökümitining mezkur kurd  siyasiti  türkiye ichide türlük inkaslargha seweb bolsimu, biraq xelqara jem'iyette  türkiyeni kurdlar mesiliside eyibleydighan döletler we teshkilatlarning qarshi élishigha érishken idi.