Лагердики тутқунларниң ғулҗа наһийисидики кийим-кечәк ишләпчиқириш базисида әмгәккә селиниватқанлиқи илгири сүрүлди

Ғулҗа наһийисидики “җяфаң кийим-кечәк мәһсулатлири бағчиси” намлиқ ишләпчиқириш базисида лагердикигә тутқунларниң мәҗбури әмгәккә селиниватқанлиқи илгири сүрүлмәктә. “җяфаң кийим-кечәк мәһсулатлар бағчиси” 2017‏-йили 8‏-айда қурулған болуп, мәзкур базида һазирға қәдәр тизимға алдурған хитайниң ширкәтлириниң сани 8 гә йетип барған. Җяңсу өлкисидики “сәнрүн гуруһи” ға қарашлиқ “шинҗаң шинйи сәнрүн чәклик” ширкити бу йил 9‏-айда тизимға алдурған. Радийомиз хитай бөлүминиң 31‏-декабир хәвәр қилишичә, мәзкур ишләпчиқириш базисидики ишчиларниң мутләқ көп қисми йиғивелиш лагерлиридин кәлгәнләр икән. Хәвәрдә, бир йәрлик мусулман аһалисиниң сөзи нәқил кәлтүрүлгән. У, тутқунларниң һәркүни 12 саәт ишләйдиғанлиқи, иштин чүшкәндин кейин йәнә бир саәт сиясий өгинишкә қатнишидиғанлиқини билдүргән. Униң ашкарилишичә, йеқинда бу базиға 2000 дәк мусулман елип келингән. Буниңдин сәл аввал или телевизийә истансиси хәвәр берип, мәзкур ишләпчиқириш базисидики бир кийим-кечәк ширкитиниң 1500 кишини ишқа орунлаштурғанлиқини елан қилған. Хәвәрдә, бир йәрлик аялни зиярәт қилинған болуп, у “нурғун адәмни ишқа елип бәк яхши қилди. Аиләм мениң бу йәрдә ишлишимни қоллайду. Мән чоқум яхши ишләймән” дегән. “ли җовән кийим-кечәк ишләпчиқириш ширкити” “җяфаң кийим-кечәк мәһсулатлири бағчиси” да тизимға алдурған карханиларниң биридур.

Или телевизийә истансисиниң хәвиридә қәйт қилинишичә, 2017‏-йили қурулған мәзкур кархана пәләй ишләпчиқиришни асас қилидикән вә ишләпчиқирилған мәһсулати чәтәлләрдә вә хитайниң ички базирида сетилидикән. Мәзкур хәвәр хәлқара таратқуларниң диққити хитайниң йиғивелиш лагерлиридики уйғур тутқунларни лагерларда яки лагер әтрапида завут-карханиларни қуруп, мәҗбури әмгәккә селиватқанлиқиға даир учурларға қаритилған мәзгилдә тарқалди. 

Йеқинда бирләшмә агентлиқи “тәйда” намлиқ бир хитай ширкитиниң хотәндики лагерларда завут қуруп, тутқунларни мәҗбури әмгәккә селиватқанлиқини ашкарилиған. Бир америка сода ширкитиниң бу лагерда ишләпчирилған тәнтәрбийә кийимлирини импорт қилиши америкида ғулғула қозғиған. Америка таможна вә чегра қоғдаш идариси америкидики бир ширкәтниң хитайниң хотәндики йиғивелиш лагерлирида ишләпчиқирилған кийим-кечәкләрни импорт қилип, америка базириға салғанлиқиға даир учурларни тәкшүрүшкә башлиғанлиқини билдүргән иди.