Хитай лагерлардики уйғур ихтисас игилириниң орнини ичкиридин хитайларни йөткәп келип толдурмақта

Мухбиримиз әркин
2019-01-14
Елхәт
Пикир
Share
Принт

Хитай даирилириниң уйғурларни кәң көләмлик тутқун қилип, лагерларға қамиши яки қамақ җазалириға һөкүм қилиши уйғур районида нурғун хизмәт орунлириниң бош қелип, ихтисас игилири қәһәтчилики пәйда қилған. Вәзийәттин хәвәрдар йәрлик аһалиләрниң радийомизға ашкарилишичә, нөвәттә хитай даирилири ичкири өлкиләрдин хитайларни юқири мааш, юқири параванлиқ билән йөткәп келип, бу бошлуқни толдурмақта икән. Бу йил 1‏-айда уйғур аптоном райониниң һәр қайси җайлиридики йәрлик һөкүмәтләр хитайниң мәмликәт миқясиға 13 миңдәк мәмурий хадим, сақчи, оқутқучи қобул қилиш елани чиқарған. Йиғивелиш лагерида йетип чиққан бир йәрлик аһалиниң радийомиз хитай бөлүмигә билдүрүшичә, нөвәттә уйғур районидики йәрлик милләтләр олтурушлуқ районларда әркәкләрни учритиш қийин болуп, даириләр бу бошлуқни ичкири өлкиләрдин хизмәтчи қобул қилиш арқилиқ толдурушқа урунмақта икән.

Қәшқәр университети йеқинда җәмийәткә 173 нәпәр хизмәтчи қобул қилиш елани чиқарған. Хизмәтчи қобул қилиш шәртлири наһайити қаттиқ болуп, униңда бурун «түзүмгә хилаплиқ қилип» мәсилиси техи бир тәрәп қилинмиған кишиләрниң қобул қилинмайдиғанлиқи әскәртилгән. 

Өткән йили қәшқәр университетиниң нурғун уйғур хизмәтчилири тутқун қилинған. Тутқунларниң ичидә мәзкур университетниң 4 мудири вә муавин мудири бар иди. Улар «икки йүзлимичилик» билән әйиблинип тутқун қилинған иди. 

Йәрлик ахбарат васитилириниң хәвәрлиридин ашкарилинишичә, бу йил йәнә йәкән, йопурға, җиң наһийиси, қизил су области, или области қатарлиқ җайлар арқа-арқидин хизмәтчи қобул қилиш елани чиқарған. Мәлум болушичә, йәкән наһийилик маарип тармақлири бу йил 5000 оқутқучи қобул қилидикән. Наһийилик маарип идарисиниң бир хадими, қобул қилиш яш чәклимисиниң «30 яки униңдин төвән» ликини билдүргән. Мәлум болушичә, қизилсу областлиқ сиясий қанун комитети вә җ х идариси хитайниң гәнсу, шәнши, хенән, сичүән, йүннән вә чоңчиң қатарлиқ өлкә һәм шәһәрлиригә адәм қобул қилиш үчүн хизмәт гурупписи әвәткән. Бурун қарамайдики бир йиғивелиш лагерида йетип чиққан қазақистан пуқраси өмәр бекалиниң өткән җүмә күни радийомиз хитай бөлүминиң мухбириға билдүрүшичә, һазир лагерларда 4‏-5 милйондәк адәм тутуп турулмақтикән. У қарамайниң өзидә «әркәкләрниң йүздә 80 % и тутқун қилинғанлиқи» ни илгири сүргән. 

Хитай һөкүмити бу орунларниң лагер икәнликини рәт қилип, «кәспий техника мәркәзлири» икәнликини илгири сүрсиму, бирақ униңда қанчилик адәм «кәспий тәрбийә» көрүватқанлиқини ашкарилап бақмиди.

Пикирләр (0)
Share
Толуқ бәт