«Хитайдики уйғур лагерлири» муһакимә йиғинида лагерлар үстидин хәлқаралиқ тәкшүрүш йүргүзүш тәләп қилинди

Мухбиримиз ирадә
2019-05-16
Елхәт
Пикир
Share
Принт

14-Май, йәни сәйшәнбә күни бирюсселдики ахбарат кулубида «хитайдики уйғур лагерлири» темисида бир муһакимә йиғини чақирилған. Йиғинда сөз қилған мутәхәссисләр хәлқара җамаәтни уйғурлар учраватқан зулумға диққәт қилишқа чақирған.

«Куна» намлиқ хәвәр агентлиқиниң хәвиригә қариғанда, бу муһакимә йиғиниға копенһаген университетида уйғур мәдәнийити бойичә пост-докторлуқ тәтқиқати билән шуғуллиниватқан руни стинберг сөз қилған. У сөзидә әйни вақитта хитай һөкүмитиниң уйғурларни кәң көләмдә тутқун қилип лагерға қамаватқанлиқи һәққидә хәвәрләр чиққанда явропада һечкимниң, һәтта ахбаратларниңму ишәнмигәнликини, ақивәттә буниң бүгүнки дунядики зор паҗиәгә айланғанлиқини билдүргән. У аз дегәндә бир милйон киши қамалған бу лагерларда толиму қорқунчлуқ зулумлар, қейин-қистақлар йүз бериватқанлиқини әскәртип, бу лагерлар үстидин хәлқаралиқ тәкшүрүш йүргүзүлүши керәкликини әскәрткән. 

Бирюсселдики һөрийәт университетиниң хитай ишлири мутәхәссиси венесса фирангвил сөзидә хитай һөкүмитиниң уйғур елида йүргүзүватқан сиясәтлиригә қарита җамаәт пикри қозғилиши керәкликини тәкитләп, «биз хитай һөкүмити билән нормал алақимизни давам қилмаслиқимиз керәк. Биз хитайда орунлаштурулған муһакимә йиғинлириға қатнашмаслиқимиз, хитай илмий хадимлирини явропадики муһакимә йиғинлириға тәклип қилмаслиқимиз керәк,» дегән. 

Венисса ханим йәнә лагерларни тақаш үчүн хитай һөкүмитигә дипломатик вә иқтисадий бесим ишлитилиш керәкликини тәкитлигән. 

Йиғинда йәнә явропа иттипақи иқтисадий вә иҗтимаий комитетиниң әзаси, кишилик һоқуқ паалийәтчиси мади шарма ханим вә финландийәдики уйғур паалийәтчи халмурат қатарлиқларму сөз қилған. 

Мади шарма ханим сөзидә явропа иттипақини бу мәсилидики сүкүтини бузушқа чақирған болса, халмурат өз сөзидә чәтәлләрдики уйғур җамаитиниң дуня җамаәтчиликиниң қоллишиға вә риғбәтләндүрүшигә еһтияҗлиқ икәнликини әскәрткән.

Пикирләр (0)
Share
Толуқ бәт