"Xitaydiki Uyghur lagérliri" muhakime yighinida lagérlar üstidin xelq'araliq tekshürüsh yürgüzüsh telep qilindi

Muxbirimiz irade
2019-05-16
Élxet
Pikir
Share
Print

14-May, yeni seyshenbe küni biryusséldiki axbarat kulubida "Xitaydiki Uyghur lagérliri" témisida bir muhakime yighini chaqirilghan. Yighinda söz qilghan mutexessisler xelq'ara jama'etni Uyghurlar uchrawatqan zulumgha diqqet qilishqa chaqirghan.

"Kuna" namliq xewer agéntliqining xewirige qarighanda, bu muhakime yighinigha kopénhagén uniwérsitétida Uyghur medeniyiti boyiche post-doktorluq tetqiqati bilen shughulliniwatqan runi stinbérg söz qilghan. U sözide eyni waqitta xitay hökümitining Uyghurlarni keng kölemde tutqun qilip lagérgha qamawatqanliqi heqqide xewerler chiqqanda yawropada héchkimning, hetta axbaratlarningmu ishenmigenlikini, aqiwette buning bügünki dunyadiki zor paji'ege aylan'ghanliqini bildürgen. U az dégende bir milyon kishi qamalghan bu lagérlarda tolimu qorqunchluq zulumlar, qéyin-qistaqlar yüz bériwatqanliqini eskertip, bu lagérlar üstidin xelq'araliq tekshürüsh yürgüzülüshi kéreklikini eskertken. 

Biryusséldiki höriyet uniwérsitétining xitay ishliri mutexessisi wénéssa firan'gwil sözide xitay hökümitining Uyghur élida yürgüzüwatqan siyasetlirige qarita jama'et pikri qozghilishi kéreklikini tekitlep, "Biz xitay hökümiti bilen normal alaqimizni dawam qilmasliqimiz kérek. Biz xitayda orunlashturulghan muhakime yighinlirigha qatnashmasliqimiz, xitay ilmiy xadimlirini yawropadiki muhakime yighinlirigha teklip qilmasliqimiz kérek," dégen. 

Wénissa xanim yene lagérlarni taqash üchün xitay hökümitige diplomatik we iqtisadiy bésim ishlitilish kéreklikini tekitligen. 

Yighinda yene yawropa ittipaqi iqtisadiy we ijtima'iy komitétining ezasi, kishilik hoquq pa'aliyetchisi madi sharma xanim we finlandiyediki Uyghur pa'aliyetchi xalmurat qatarliqlarmu söz qilghan. 

Madi sharma xanim sözide yawropa ittipaqini bu mesilidiki sükütini buzushqa chaqirghan bolsa, xalmurat öz sözide chet'ellerdiki Uyghur jama'itining dunya jama'etchilikining qollishigha we righbetlendürüshige éhtiyajliq ikenlikini eskertken.

Toluq bet