Xitay hökümiti lagérlardiki ékskursiye pa'aliyitini dawam qildurmaqta

Muxbirimiz eziz
2019-03-12
Élxet
Pikir
Share
Print

Uyghurlar diyaridiki milyonlighan Uyghurning lagérlargha solinishi herqaysi axbarat wasitiliride we hökümetlerning yighinlirida köplep tekitlen'gendin kéyin xitay hökümiti bir türküm ékskursiye ömiki teshkillep, Uyghurlar diyarining herqaysi jayliridiki atalmish "Terbiyelesh merkezliri" ni ziyaret qildurghan idi.

Ötken hepte aljiriye, marakesh, sin'gapor, wén'giriye, ereb ittipaqining xitaydiki wekili qatarliqlardin teshkillen'gen yene bir türküm chet'el diplomatlar ömiki Uyghurlar diyarida ziyarette bolghan.

Xitay hökümitining awazi bolghan shinxu'a agéntliqining 11-marttiki xewiride éytilishiche, wekiller ömiki aldi bilen ürümchidiki "Büyük bazar" ni ziyaret qilghan. Shundaqla zorawanliq we térrorluq weqeliri körgezmisini körgen. Ular qeshqerdiki "Kespiy terbiyelesh merkizi" de kursantlarning qanun bilimliri öginiwatqanliqini körgen. Kursantlardin miradil yüsüp ömektikilerge ilgiri özining diniy esebiylik bilen yuqumlan'ghanliqini, jümlidin "Xelq puli" ni "Kapirning puli", dep terk etkenlikini, hazir bolsa bu xil terbiyelesh arqiliq buningdin xalas bolghanliqini sözlep bergen.

Shinxu'a agéntliqi bu heqtiki xewiride mezkur ékskursiye ömiki ezalirining "Tesiratliri" ni köplep bayan qilghan. Jümlidin ömektikilerning herqaysi jaylardiki mehelle komitétlirining alte yashtin kichik balilargha her küni bir qaptin heqsiz süt tarqitidighanliqini körüp "Sütni balilarning qoligha, muhebbetni balilarning qelbige yetküzidiken" dégenlikini teshwiq qilghan.

Halbuki analizchilar mezkur ömektikilerning asasen xitay hökümitining sizghan siziqidin chiqmaydighan döletlerdin kelgenlikini tekitlesh bilen birge, xitay xewerliridiki wekillerning sözlirining rast-yalghanliqi heqqide zor gumanlar mewjutluqini tekitlidi. Shundaqla xitay axbaratida yéngi zélandiyening sabiq bash ministiri jénniy shipléy aghzidin bérilgen bayanlarni kéyinche jénniy xanimning "Men héchqachan undaq démigen" dep inkar qilghanliqini buninggha misal qilip körsetti.

Toluq bet