Gülxumarning anisini qutquzush herikiti zor qollashqa érishmekte

Muxbirimiz eziz
2019.02.04

Uyghur diyaridiki milyonlighan Uyghurlar lagérlargha qamiliwatqanda firansiyede olturushluq gulxumar lagérgha qamalghan anisini qutquzush üchün her sahe kishiliridin shundaqla firansiye hökümitidin jiddiy yardem tilep qilip, Uyghur diyaridiki lagérlar mesilisini téximu köp kishilerge bildürmekte.

Alaqidar xewerlerdin melum bolushiche, gulxumar 2004-yili 14 yéshida ata-anisigha egiship firansiyege köchüp kelgen. Ular kéyinche firansiye puqraliqini alghan bolsimu, gülxumarning anisi gülbahar xanim wetendiki tughqanlirini yoqlap turushqa qulay bolushi üchün firansiyening “Yéshil karta” sini alghan hemde özining xitay puqraliqini saqlap qalghan. 2016-Yili gülbahar xanim pénsiye ma'ashigha munasiwetlik jedwellerge imza qoyush heqqidiki téléfon uqturushini alghandin kéyin ayropilan bilen béyjinggha uchqan. Emma béyjing ayrodromida gülbahar xanimning qolidiki xitay pasporti musadire qilin'ghan. U jedwellerge qol qoyush üchün esli idarisige
Barghanda uni kütüp turghini xitay dölet xewpsizlik idarisining xadimliri bolghan.

Gulxumar kéyinche wetendiki hammisi we bashqa kishilerdin anisining lagérgha élip kétilgenlikini anglighan. 2017-Yili u kanada tewelikidiki bir Uyghur ayalning anisi qamalghan lagérdin qoyup bérilgenlikini anglighandin kéyin u ayaldin anisining ehwalini uqushqa barghan. Anisini tonuydighan hemde anisi bilen bir lagérda turghan, yene kélip 2016-yili anisi bilen oxshash waqitta tutqun qilin'ghan bu ayalni izdep tapqanda u ayalning alliqachan nérwisidin ketkenlikini, uning kün boyi dérize tüwide olturup öz-özige toxtimay sözleydighan we xitay kompartiyesini küyleydighan xitayche naxshilarni ghingshiydighan bolup qalghanliqini bilgen. Anisining hazirqi ehwalidin héchqandaq xewer alalmighandin kéyin gulxumar anisi üchün özi küresh qilishqa bel baghlighan.

Gulxumar shuningdin buyan herqaysi axbarat wasitilirige, munasiwetlik shexslerge, shuningdek firansiye tashqi ishlar ministirliqigha anisining we Uyghurlar diyaridiki lagérlarning ehwali heqqide köp qétimlap melumat bergen. Shuning bilen birge anisini qutquzush üchün torda muraji'etname chiqarghan. Ötken heptige qeder bu muraji'etnamige imza qoyghanlar 450 ming kishige yetken. Hazir bolsa firansiye prézidénti émmanu'él makron bilen alaqilishish hemde uningdin anisini qutquzup chiqishqa yardemlishishni telep qilish üchün tirishmaqta iken. U bu heqte söz qilip, “Yaxshi ademla bolsa hemmisi hazir lagérgha qamiliwatidu. Yene kélip yaxshi ademlerni hökümetke pash qilish telep qiliniwatidu. Chünki xitay kompartiyesi hazir öz xelqidin özi ashu derijide qorqidighan halgha chüshüp qalghan,” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.