"Nyu-york waqti géziti" lagérlarning dawamliq kéngeytiliwatqanliqini ilgiri sürdi

Muxbirimiz erkin
2019-08-12
Élxet
Pikir
Share
Print

"Nyu-york waqti géziti" ötken shenbe küni Uyghurlar heqqide xewer élan qilip, xitay hökümiti "Qayta terbiyelesh merkezliri" dep kéliwatqan lagérlarning taqilishi uyaqta tursun, téximu kéngiyiwatqanliqini ilgiri sürgen.

Xewerde "Nyu-york waqti géziti" muxbirlirining rayonda 7 künlük ziyaret élip bérip, xitay istibdat rehbiri shi jinping teripidin qurulghan lagérlar torining izchil meshghulat élip bériwatqanliqi we kéngiyiwatqanliqini bayqighanliqi tekitlen'gen. Yéqinda Uyghur aptonom rayonining re'isi shöhret zakir bilen mu'awin re'isi erkin tuniyaz lagérdiki 90 pirsent tutqunning qoyup bérilip, jem'iyetke qaytqanliqini élan qilghan idi.

Lékin közetküchiler we shahitlar ularning sözining rast bolushi gumanliq dep qarimaqta. "Nyu-york waqti géziti" ning xewiride xitay hökümiti ochuq-ashkara bolushqa wede qilghan bolsimu, lékin rayondiki chong-kichik lagérlarning yenila qattiq bixeterlik we mexpiyetlik astida kontrol qilinidighanliqi, xoten etrapida chong tipliq 5 lagér barliqini bildürgen. Xewerde bayan qilinishiche, muxbirlar sün'iy hemrada tartilghan resimlerdin xotendiki bir lagérning qarshi teripige yene bir yéngi lagér sélin'ghanliqini bayqighan. Xewerde "Nyu-york waqti géziti" muxbirlirining bu lagérlar we uning etrapidiki zawutlargha hemde bashqa jaylardiki diniy orunlargha yéqinlishishqa urun'ghan bolsimu, biraq saqchilarning ghelite seweblerni körsitip tosushigha uchrighanliqi tekitlen'gen.

Xewerde bayan qilinishiche, yerlik da'iriler muxbirlarni "Qayta terbiyelesh merkizi" de yétip chiqqan 25 yashliq abduweli kebir isimlik bir Uyghur yashning "Öyi" de uning bilen söhbetlishishke orunlashturghan. Xewerde bu yashning xitay hökümitining teshwiqatidiki sözlerni tekrarlighanliqi, bu öyning uning öyi ikenliki muxbirlarda guman qozghighanliqi tekitlen'gen. Xewerde qeyt qilishiche, muxbirlar shu söhbettin bir qanche sa'et kéyin bu yashni öyge izdep barghan bolsimu, uni tapalmighan. Xewerde abduweli kibir ayali we uning 2 yashliq qizining bu öyde emeslikini bildürgen.

Toluq bet