Awstraliye hökümiti xitay lagérliridiki awstraliyening "Yéshil kartisi" bar Uyghurlarni qutquzushqa chaqirildi

Muxbirimiz erkin
2019-02-11
Élxet
Pikir
Share
Print

Awstraliyediki Uyghurlar kanbérra hökümitini tedbir qollinip, Uyghur rayonidiki türme, yighiwélish lagérlirigha qamalghan yaki nezerbend qilin'ghan awstraliyede, menggülük turush salahiyitige, yeni "Yéshil kartigha" ige Uyghur ahalilirini qutquzushqa chaqirghan.

En'gliye "Musteqilliq géziti" ning 11‏-féwral ashkarilishiche, nöwette awstraliyede menggülük turush salahiyitige érishken 17 neper Uyghur xitaydiki türme, "Qayta terbiyelesh" namidiki yighiwélish lagérlirida yaki a'iliside nezerbend astida tutup turulmaqta iken. Ularning a'ile ezalirining bir qismi awstraliye puqrasi bolup, ular 2017 ‏-yili yaki uningdin burun Uyghur rayonigha qaytip barghanda tutqun qilin'ghan yaki nezerbend qilin'ghan.

Awstraliyediki Uyghur pa'aliyetchi nurgül sawut xanimning "Musteqilliq géziti" ge bildürüshiche, "Bu kishilerning awstraliyede menggülük turush salahiyiti bolsimu, lékin ular Uyghur rayonigha yétip bérishighila ularning qolidiki xitay pasporti tartiwélin'ghan".

Nurgül sawut yene "Bizning otturigha qoyuwatqinimiz shinjangdiki bu 17 kishiningla mesilisi emes. Biz bu yerde ularning awstraliyediki biwasite a'ile ezalirining, weyranchiliqqa uchrighan 17 a'ilining mesilisini sözlewatimiz" dégen. Uning ilgiri sürüshiche, bu ehwal awstraliyediki a'ililerning xizmiti we rohiy salametlikige tesir körsetken.

Awstraliye sherqiy türkistan jem'iyitining re'isi nurmuhemmet mijit, xitayning türme we lagéridiki yaki nezerbend astidiki bundaq kishilerning 20 din ashidighanliqi, özlirining "Ularning bixeterliki we salametlikidin qattiq endishe qiliwatqanliqi" ni bildürgen.

Qatardiki "El jezire" téléwiziye qanilining 11‏-féwral bildürüshiche, awstraliye tashqi ishlar ministirliqi bayanatchisi nöwette herqandaq bir awstraliye puqrasining shinjangda tutqun qilin'ghanliq xewirini anglap baqmighanliqi, lékin awstraliyelik a'ililerning telipige bina'en ularning uruq-tughqanlirining qeyerde ikenlikini sürüshtürgenlikini bildürgen, lékin u qandaq jawabqa érishkenlikini éytmighan.

Toluq bet