Xitay tashqi ishlar ministirliqi sabiq lagér xadimi baymuratni “Yalghanchiliq” bilen eyibligen

Xitay tashqi ishlar ministirliqi ilgiri xitayning guchung nahiyesidiki saqchilirigha ishlep, 2018‏-yili qazaqistan'gha qéchip chiqqan qazaq puqrasi baymuratning lagérlar heqqidiki sözlirini ret qilip, uni “Yalghanchiliq” qilish bilen eyibligen. Bu yil 39 yashliq baymurat guchungluq bolup, u ilgiri bu nahiyediki xitay j x organlirigha ishligen. Ötken yili a'ilisi bilen qazaqistan'gha qéchip chiqqan baymurat yéqinda “Nyu-york waqti” gézitining ziyaritini qobul qilip, uninggha özining guchungdiki lagérda körgenlirini we qazaqistan'gha déchip kétish seweblirini ashkarilighan. “Nyu york waqti” ning 2‏-féwral bergen xewiride ashkarilinishiche, bu yil 39 yashliq baymurat 2017‏-yili guchung nahiyelik j x idarisige xizmetke kirip, yol üstidiki bir tekshürüsh ponkitida qarawulluq wezipisini ötigen. Uning wezipisi hökümetning qara tizimlikidiki musulman az sanliq milletlerni tekshürüsh bolup, bir küni da'iriler uninggha qoli koyzilan'ghan 600 kishini guchungdiki yéngi sélin'ghan bir lagérgha yallap apirish wezipisi bergen.

Uning “Nyu-york waqti” gézitige bildürüshiche, bu weqe baymuratning qazaqistan'gha qéchishida halqiliq rol oynighan. Chünki, uning uyerde körgenliri baymuratni qattiq chöchütken. Uning bildürüshiche, da'iriler bu orunlarni “Kespiy terbiyelesh merkizi” dep atisimu, lékin u bir türme iken. U “Nyu-york waqti” gézitige bergen uchurida, uning bu orunda bir tonushini uchritip, uni tonuyalmay qalghanliqi, chünki uning bek oruqlap ketkenlikini bildürgen. Uning ilgiri sürüshiche, bu lagérning “Hemme yéride kaméra bolup, eger tutqunlar xushal körünmes balagha qalidiken.”

U yene özining qazaqistan'gha qéchip chiqip uyerdiki ehwallarni ashkarilishidiki seweb heqqide toxtilip, “Buningda méning mes'uliyitim bardek hés qildim. Chünki, bek köp kishi bu lagérlarda iztirap chékiwatidu” dégen. Lékin, “Nyu york waqti” gézitining xewiride bayan qilinishiche, xitay tashqi ishlar ministirliqi bayanatchisi xu'a chünying baymuratning guchungda amanliq xizmiti ishligenlikini étirap qilghan. Emma uning saqchida emes, bir bazarning amanliq xizmitini ishligenlikini ilgiri sürüp, uning sözlirining “Hemmisi yalghan” dégen. Xitay hökümiti lagérlar heqqidiki xewerlerni ret qilsimu, lékin xelq'araning bu orunlarda musteqil tekshürüsh élip bérish teleplirini izchil ret qilip kelmekte.