Dunyadiki bir qisim uniwérsitétlarda Uyghur rayonidiki lagérlar mesilisi tonushturuldi

Muxbirimiz shöhret hoshur
2019-03-13
Élxet
Pikir
Share
Print

Tünügün, yeni 12‏-mart küni amérikaning kolombiye we en'gliyening LSE uniwérsitétida Uyghur rayondiki lagérlar mesilisi tonushturuldi.

Kolombiye uniwérsitétining qanunshunasliq institutida ötküzülgen mezkur yighinda Uyghurshunas derrén baylér, washin'gitondiki Uyghur pa'aliyetchi tahir imin, Uyghur kishilik hoquq qurulushining tetqiqatchisi zubeyre shemshidin qatarliqlar doklat bergen.

Pa'aliyetchi tahir iminning bayan qilishiche, derren baylér doklatida lagérlarning tesis qilinishigha türtke bolghan iqtisadiy we siyasiy amillar shundaqla xitayning "Térrorluq" ni bahane qilip tesis qilghan bir yürüsh bixeterlik sistémilirini qisqiche tonushturghan.

Zubeyre shemshidin tutqundiki ziyaliylar toghrisida, tahir imin bolsa lagérlarning balilargha körsetken tesiri we yétimxanilar heqqide melumat bergen.

150 Etrapida oqughuchi, oqutquchi, tetqiqatchi we pa'aliyetchiler qatnashqan bu yighinning so'al-jawab qismida lagérlarning taqilishi üchün némilerning qilinishi kérekliki muzakire qilin'ghan.

Londondiki LSE uniwérsitétida ötküzülgen yighinda proféssor rachél harris lagérlardiki kishilerning sani we uning ichidiki ehwallar heqqide melumat bergen.

10‏-Mart küni téksasta ötküzülgen "Téxnikining qarangghu teripi - diktatoriliq we téxnika" dégen témidiki muhakime yighindimu Uyghur weziyiti muhakime qilin'ghan.

Bu yighinda buzféd torining muxbiri miga xanim, Uyghur pa'aliyetchi tahir imin we "El-jezire" muxbiri melissa xanimlar söz qilip, alaqidar pen-téxnika sahesini xitay bilen hemkarlashmasliqqa dewet qilghan.

Bu yighin'gha amérikadiki bir qisim hökümet xadimliri, chong shirket sahibliri we ammiwi teshkilatlar rehberliri bolup, 300 din artuq kishi qatnashqan.

Toluq bet