Kishilik hoquq teshkilatliri yawropa ittipaqini xitaygha lagérlar mesiliside bésim ishlitishke chaqirdi

Yawropa ittipaqi we xitay yuqiri derijilik bashliqlar uchrishishi mushu ayning 9-küni ötküzülidighan bolup, yuqiriqi bu uchrishishqa qatnishidighan yawropa ittipaqi rehberliri mushu pursette Uyghur élidiki lagérlar mesilisi we bashqa kishilik hoquq mesililiride xitaygha bésim qilishqa chaqirildi.

Yuqiriqi bu chaqiriq xelq'ara kechürüm teshkilati, kishilik hoquqni közitish teshkilati, xelq'ara tibet herikiti, xelq'ara kishilik hoquq mulazimiti, xelq'ara kishilik hoquq fédiratsiyesi qatarliq 5 organning ortaq imzasida élan qilin'ghan.

Téxi ikki kün aldida, yeni 4-ayning 1- we 2-künliri yawropa ittipaqi we xitay arisidiki kishilik hoquq diyalogi biryussélda ötküzülgen we yawropa ittipaqi söhbette Uyghur rayondiki yighiwélish lagérliri mesilisidin endishe qiliwatqanliqini, yawropa ittipaqining lagérlarni cheklimisiz we musteqil halda tekshürüshige yol qoyushni telep qilghan idi.

Yuqiriqi teshkilatlar yawropa ittipaqini kishilik hoquq diyalogida otturigha qoyghan bu telep we endishilirini 9-apirildiki uchrishishtimu qayta tekitlesh, bu heqte xitaygha ortaq bésim hasil qilishni tekitligen.

Kishilik hoquq söhbitide yawropa ittipaqi Uyghur siyasiy mehbuslardin ilham toxti, tashpolat téyip, rahile dawut, eli mamut, gheyret niyaz, memetjan abdulla we abduxélil zununlarning qoyup bérilishi telep qilghan idi.