Amérika dölet mudapi'e ministirliqi: “Xitay 3 milyondek musulmanni jaza lagérlirida tutup turmaqta”

Amérika dölet mudapi'e ministirliqining yuqiri derijilik bir emeldari xitayning Uyghur rayonida jaza lagérlirini qurup, 3 milyon'gha yéqin Uyghur we bashqa milletlerni bu lagérlargha qamighanliqini bildürgen.

Bu amérika hökümet emeldarlirining tunji qétim rayondiki lagérlarni “Jaza lagérliri” dep teriplishi, shuningdek bu lagérlardiki tutqunlarning sanini 3 milyon'gha yéqin, dep élan qilishidur. Amérikadiki “Forbis” tor zhurnilining xewer qilishiche, bu sözlerni amérika dölet mudapi'e ministirliqining hindi-tinch okyan bixeterlik ishlirigha mes'ul yardemchi ministiri rendi shraywér ötken jüme küni amérika dölet mudapi'e ministirliqida ötküzülgen axbarat yighinida qilghan. Axbarat yighini besh dölet mudapi'e ministirliqining yilliq mudapi'e doklatini élan qilish munasiwiti bilen ötküzülgen bolup, u “Xitayda yüz bériwatqan basturushning jiddiy endishe yaritiwatqanliqi, kompartiyening amanliq küchlirini ishqa sélip, musulmanlarni keng kölemlik jaza lagérlirigha qamighanliqi” heqqide sözligen.

Rendi shraywér bir muxbirning néme üchün uning “Jaza lagérliri” dégen sözni ishletkenliki heqqidiki so'aligha jawab bérip, “Bir milyon kishining yaki 10 milyon nopusluq bir xelqning 3 milyondek ahalisining tutqun qilinishi intayin zor reqem. Biz igiligen tutqunning kölimi, u yerde yüz bériwatqan ishlar, xitayning hökümitining meqsiti we uning ashkara bayanlirini nezerde tutqanda méningche bu intayin muwapiq bir teripleshtur” dégen. “Forbés” zhurnilining xewiride ilgiri sürülüshiche, rendi shraywérning sözi amérika hökümet emeldarlirining Uyghur mesiliside xitaygha qaratqan tenqidining yéngi pellige kötürülgenlikini ipadileydiken. Bu rendi shraywérning Uyghur mesiliside xitayni tunji qétim tenqid qilishi emes. U yéqinda washin'gtondiki xadson institutida nutuq sözligendimu Uyghurlarni tilgha élip xitayni tenqidligen idi.