Америка дөләт мудапиә министирлиқи: “хитай 3 милйондәк мусулманни җаза лагерлирида тутуп турмақта”

• Мухбиримиз әркин
  2019-05-06

Америка дөләт мудапиә министирлиқиниң юқири дәриҗилик бир әмәлдари хитайниң уйғур районида җаза лагерлирини қуруп, 3 милйонға йеқин уйғур вә башқа милләтләрни бу лагерларға қамиғанлиқини билдүргән.

Бу америка һөкүмәт әмәлдарлириниң тунҗи қетим райондики лагерларни “җаза лагерлири” дәп тәриплиши, шуниңдәк бу лагерлардики тутқунларниң санини 3 милйонға йеқин, дәп елан қилишидур. Америкадики “форбис” тор журнилиниң хәвәр қилишичә, бу сөзләрни америка дөләт мудапиә министирлиқиниң һинди-тинч окян бихәтәрлик ишлириға мәсул ярдәмчи министири рәнди шрайвер өткән җүмә күни америка дөләт мудапиә министирлиқида өткүзүлгән ахбарат йиғинида қилған. Ахбарат йиғини бәш дөләт мудапиә министирлиқиниң йиллиқ мудапиә доклатини елан қилиш мунасивити билән өткүзүлгән болуп, у “хитайда йүз бериватқан бастурушниң җиддий әндишә яритиватқанлиқи, компартийәниң аманлиқ күчлирини ишқа селип, мусулманларни кәң көләмлик җаза лагерлириға қамиғанлиқи” һәққидә сөзлигән.

Рәнди шрайвер бир мухбирниң немә үчүн униң “җаза лагерлири” дегән сөзни ишләткәнлики һәққидики соалиға җаваб берип, “бир милйон кишиниң яки 10 милйон нопуслуқ бир хәлқниң 3 милйондәк аһалисиниң тутқун қилиниши интайин зор рәқәм. Биз игилигән тутқунниң көлими, у йәрдә йүз бериватқан ишлар, хитайниң һөкүмитиниң мәқсити вә униң ашкара баянлирини нәзәрдә тутқанда мениңчә бу интайин мувапиқ бир тәрипләштур” дегән. “форбес” журнилиниң хәвиридә илгири сүрүлүшичә, рәнди шрайверниң сөзи америка һөкүмәт әмәлдарлириниң уйғур мәсилисидә хитайға қаратқан тәнқидиниң йеңи пәллигә көтүрүлгәнликини ипадиләйдикән. Бу рәнди шрайверниң уйғур мәсилисидә хитайни тунҗи қетим тәнқид қилиши әмәс. У йеқинда вашингтондики хадсон институтида нутуқ сөзлигәндиму уйғурларни тилға елип хитайни тәнқидлигән иди.