Америка дөләтлик аммиви радийосиниң мухбири хитайниң лагерлар һәққидики ялғанчилиқлириға ишәнмигән

Мухбиримиз сада
2019-05-08
Елхәт
Пикир
Share
Принт

Бу йил апрел ейида хитай һөкүмити чәтәллик мухбирларни тәшкилләп, уйғур дияриниң қәшқәр шәһиридики мәлум бир йиғивелиш лагерини зиярәт қилдурған иди. Һалбуки, бу қетимлиқ «алдин орунлаштурулған зиярәт» америка дөләтлик аммиви радийосиниң мухбири роб шимитзни хитайниң лагерлардики сахта көрүнүшлиригә ишәндүрәлмигән.

Уйғур диярида зиярәттә болған мәзкур радийониң мухбири роб шимитз 7-май күни «‹ашқун идийәләр' сәвәблик тутқун қилинғанлар өзидә шундақ ишниң барлиқини билмәйдикән» сәрләвһилик мақалисини елан қилған. Мәзкур мақалидә лагерлардики уйғурларниң өзлириниң немә сәвәбтин тутқун қилинғанлиқини әсла билмәйдиғанлиқи йорутуп берилгән.

Мақалидин мәлум болушичә, мухбир роб шимитз лагердики уйғур тутқунлардин немә сәвәбтин бу йәрдә тәрбийәлиниватқанлиқини сориғинида, йеши чоң кишиләрниң һәммиси охшашла «мәндә еғир 'ашқун' идийә бар, мән балилиримни кичик вақтидин башлапла диний паалийәтләргә қатнаштурдум. Мән уларни нахша ейтқили, уссул ойниғили қоймай, әркинликини чәкләп қойдум,» дәп җаваб бәргән.

Мақалидә йәнә атуштики мәлум бир қайта тәрбийә лагери хадиминиң сөзлириму нәқил елинған. У сөзидә «бу йәргә кәлгәнләрниң һәммиси ‹ашқун идийә' ниң немиликини билмәйду, көпинчилири хитайчини, һәтта хитайниң қанунини чүшәнмәйду. Булар иқтидарсиз вә тәрбийә көрмигән кишиләр» дегән. Роб шимитзниң тәкитлишичә, юқириқи сөзләр «ашқун идийәниң немиликини билмәйдиған кишиләр немә үчүн тутқун қилиниду?» дәйдиған соални пәйда қилидикән.

Қәшқәрдики аталмиш «техника тәрбийәләш мәркизи» дики зиярәт ахирлашқандин кейин, даириләр мухбирларни «тәрбийәләнгүчиләр» ниң ятақ бинасини зиярәт қилдурған. Бу җәрянда тутқунлар һәр алтә адәмниң бир ятақта туридиғанлиқи, ятақниң интайин раһәт икәнликини ейтип өткән. Һалбуки, мухбирлар тамниң бурҗикигә йезилған, әмма үсти бир қәвәт сирланған нәччә қур хәтни байқиған, хәттә «бу ятақ бәк есил, чида йүриким» дәп йезилған икән.

Пикирләр (0)
Share
Толуқ бәт