Атақлиқ обзорчи с җ верлемән хәлқара җәмийәтни уйғур елидики трагедийәни тохтитишқа кечикип қалмаслиққа чақирди

Мухбиримиз ирадә
2019-05-14
Елхәт
Пикир
Share
Принт

Америкадики тонулған обзорчи вә тәтқиқатчи с җ верлемән дуня җамаәтчиликиниң хитай һөкүмитиниң уйғурларға йүргүзүватқан сиясәтлирини тохтитишқа кечикип қеливатқанлиқини билдүрди.

У, түркийә дөләтлик радийо-телевизийәси т р т ниң инглизчә сәһиписидә елан қилған бу һәқтики мақалисидә, хитай һөкүмитиниң уйғур елидики мусулманларни «йиғивелиш лагерлири» ға қамаватқанлиқи һәққидә нурғун пакитлар мәвҗут болсиму, әмма буниңға қарита йетәрлик дәриҗидә дуняви бир наразилиқниң оттуриға чиқмайватқанлиқини билдүргән вә униң сәвәблирини мулаһизә қилған.

Униң қаришичә, буниңдики муһим сәвәбләрниң бири, хитай компартийәсиниң бу лагерларға аит диққәт қозғайдиған вә кишиләрни чөчүтүветидиған көрүнүшләрниң ахбарат, телевизийә вә иҗтимаий таратқуларда тарқилип кетишини қаттиқ контрол қилиши билән мунасивәтлик икән. Чүнки, хитай бундақ көрүнүшләрниң җамаәтни дәрһал һәрикәткә кәлтүридиғанлиқини билидикән.

У йәнә, хитай һөкүмитиниң иқтисадий күчидин пайдилинип туруп, өзи билән тиҗарәт қиливатқан дөләтләрниң сүкүтини сетивалғанлиқини җүмлидин, түркийәдин башқа мусулман дөләтләрниң сүкүттә турувелишидики сәвәбниң дәл мушу икәнликини баян қилған.

Обзорчи с җ верлемән, хитай һөкүмитиниң зор бихәтәрлик аппаратлирини ишқа селиш арқилиқ чәтәлләрдә паалийәт қиливатқан уйғурларға тәһдит селишниму буниңдики бир амил, дәп көрсәткән. У, чәтәлләрдә яшаватқан уйғурларниңму хитай һөкүмити уларниң юртлирида қалған ата-аниси вә башқа уруқ-туғқанлиридин өч алмаслиқи үчүн сүкүттә турушқа мәҗбур болуватқанлиқини баян қилған.

С җ верлемән мақалиси ахирида, хитай һөкүмитиниң уйғурларға қиливатқан зиянкәшликиниң рәт қилғусиз дәриҗидики пакитлири барлиқини әскәртип туруп, хәлқара җамаәтни бу трагедийәни тохтитишқа кечикип қалмаслиққа агаһландурған.

Пикирләр (0)
Share
Толуқ бәт