Җов байден: "бир милйондин артуқ мусулманниң лагерларда тутуп турулуши мәнтиқисизлиқтур"

Мухбиримиз әркин
2020-06-29
Share

Американиң сабиқ муавин президенти, демократлар партийәсиниң президент намзати җов байден хитайниң бир милйондин артуқ уйғурни лагерларда тутуп турушиниң мәнтиқисизлиқ икәнлики, униңға қарши туридиғанлиқини билдүргән.

Байденниң уғурлар һәққидики бу сөзи униң америка мусулманлириға қаритилған сайлам пиланида тилға елинған. Җов байденниң тәкитлишичә, әгәр у президентлиққа сайлинип қалса, "шинҗаңдики йиғивелиш лагерлириға қарши гәп қилидикән, шундақла бу қорқунчлуқ бастурушта җавабкарлиқи бар шәхс вә ширкәтләрни җавабкарлиққа тартидикән."

Җов байден йәнә һиндистандики ассам, кәшмир, бирмадики роһиңгалиқ мусулманлар һәққидиму тохталған. У кәшмир һәққидә һиндистан һөкүмитиниң "зөрүр тәдбирләрни елип, кәшмирдики барлиқ хәлқләрниң һоқуқини әслигә кәлтүрүши керәклики" ни билдүргән. Җов байден уйғурлар һәққидә мундақ дегән: "хитайниң ғәрбидә бир милйондин артуқ уйғурниң мәҗбури қамилиши мәнтиқисизлиқ. Мән президент болуш сүпитимдә шинҗаңдики йиғивелиш лагерлириға қарши сөзләймән. Бу қорқунчлуқ бастурушта җавабкарлиқи бар шәхс вә ширкәтләрни җавабкарлиққа тартимән."

Җов байден өзиниң юқириқи шәхс һәм ширкәтләрни җавабкарлиққа тартишта қандақ конкрет җазалаш тәдбирлирини қоллинидиғанлиқини тилға алмиған болсиму, лекин бу уйғур мәсилисиниң тунҗи қетим америкадики президент сайлимида бир сиясий партийә намзатиниң сайлам пиланида тилға елинишидур. Бу йил 11-айдики сайламда җов байден билән президент доналд трамп президентлиқни талишиду. Президент трамп йеқинда "уйғур кишилик һоқуқ сиясити қануни" ға имза қойған. Мәзкур қанунда америка президентиниң мәвҗут қануний чариләрни ишлитип, уйғурларни хорлаватқан хитай әмәлдарлириға ембарго йүргүзүши тәләп қилинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт