Jow baydén: "Bir milyondin artuq musulmanning lagérlarda tutup turulushi mentiqisizliqtur"

Muxbirimiz erkin
2020-06-29
Élxet
Pikir
Share
Print

Amérikaning sabiq mu'awin prézidénti, démokratlar partiyesining prézidént namzati jow baydén xitayning bir milyondin artuq Uyghurni lagérlarda tutup turushining mentiqisizliq ikenliki, uninggha qarshi turidighanliqini bildürgen.

Baydénning ughurlar heqqidiki bu sözi uning amérika musulmanlirigha qaritilghan saylam pilanida tilgha élin'ghan. Jow baydénning tekitlishiche, eger u prézidéntliqqa saylinip qalsa, "Shinjangdiki yighiwélish lagérlirigha qarshi gep qilidiken, shundaqla bu qorqunchluq basturushta jawabkarliqi bar shexs we shirketlerni jawabkarliqqa tartidiken."

Jow baydén yene hindistandiki assam, keshmir, birmadiki rohinggaliq musulmanlar heqqidimu toxtalghan. U keshmir heqqide hindistan hökümitining "Zörür tedbirlerni élip, keshmirdiki barliq xelqlerning hoquqini eslige keltürüshi kérekliki" ni bildürgen. Jow baydén Uyghurlar heqqide mundaq dégen: "Xitayning gherbide bir milyondin artuq Uyghurning mejburi qamilishi mentiqisizliq. Men prézidént bolush süpitimde shinjangdiki yighiwélish lagérlirigha qarshi sözleymen. Bu qorqunchluq basturushta jawabkarliqi bar shexs we shirketlerni jawabkarliqqa tartimen."

Jow baydén özining yuqiriqi shexs hem shirketlerni jawabkarliqqa tartishta qandaq konkrét jazalash tedbirlirini qollinidighanliqini tilgha almighan bolsimu, lékin bu Uyghur mesilisining tunji qétim amérikadiki prézidént saylimida bir siyasiy partiye namzatining saylam pilanida tilgha élinishidur. Bu yil 11-aydiki saylamda jow baydén bilen prézidént donald tramp prézidéntliqni talishidu. Prézidént tramp yéqinda "Uyghur kishilik hoquq siyasiti qanuni" gha imza qoyghan. Mezkur qanunda amérika prézidéntining mewjut qanuniy charilerni ishlitip, Uyghurlarni xorlawatqan xitay emeldarlirigha émbargo yürgüzüshi telep qilin'ghan idi.

Toluq bet