Lagérlar mesilisi dawamliq xelq'araning diqqitide bolmaqta

Xitay hökümiti Uyghur diyaridiki lagérlardiki ademlerning mutleq köpini qoyup bergenlikini we lagérlarning taqalghanliqini éytqan bolsimu, xelq'arada bu heqtiki guman we reddiyeler heqqide köplep pikirler otturigha chiqmaqta.

9-Séntebir küni amérikadiki “Yer shari pochtisi” torida élan qilin'ghan runi sténbérg imzasidiki mexsus maqalida xelq'araning lagérlar heqqidiki gumani yene bir qétim sistémiliq otturigha qoyuldi.

Maqalida körsitilishiche, xitay hökümitining “Lagérlar taqaldi” dégen mezmundiki bayanlirining rast-yalghanliqi qanchilik bolushidin qet'iynezer mushuning özi xitay hökümitining lagérlarni “Dawamliq ijra qilishqa bolidighan tedbir emesken” dep ten alghanliqining bir ipadisi iken. Chünki lagérlar mesilisi boyiche xitay hökümitining xelq'ara axbaratta yüzi tökülüshi, diplomatiye jehette bésimlar we tenqidlerge duch kélishi, shuningdek iqtisadiy jehette bir qatar putlikashanglargha uchrishi alliqachan xitay hökümitini obdanla “Terletken”.

Aptorning qarishiche, nöwette “Lagérdin chiqti” dep qaralghan kishilerning mutleq köp qismi zawutlardiki pütünley yaki qismen heq bérilmeydighan mejburiy emgek küchlirige aylanduruwétilgen. Bu zawutlarning mehsulatliri bolsa yawropa we amérikadiki bir qisim shirketlerning xitay bilen bolidighan sodisi üchün ishlitilidiken.

Aptor axirida lagérlar heqqide xelq'ara dunyaning oxshash bolmighan ikki qutupqa ayrilishi heqqide toxtilip: “Xitayning shinjang rayonidiki qattiq qol siyasitini eyiblesh hindistanning keshmirge qol tiqishi, isra'iliyening pelestindiki qilmishliri yaki türkiyening kurdlargha hujum qilishini tenqidlesh bilen tüptin perqliq bolghan hadise” deydu.