Xitay da'iriliri yene 6 döletning muxbirlirini Uyghur rayonida ziyaretke teshkilligen

• Muxbirimiz erkin
  2019-01-11

Xitay da'iriliri 9‏-yanwardin bashlap türkiye, misir, pakistan, afghanistan, ban'gladesh, sirilanka qatarliq 6 döletning muxbirlirini Uyghur aptonom rayonida ziyaretke teshkilligen.

Bu, xitay da'irilirining Uyghur rayonidiki 3 milyondek adem qamalghan yighiwélish lagérlirini “Kespiy terbiyelesh merkezliri” dep aqlashqa bashlighandin béri 2‏-qétim bu xil ziyaretke teshkillishidur. Da'iriler ötken hepte bir guruppa chet'el muxbirlirini qeshqer, xoten shehiri we qaraqash nahiyesidiki 3 “Kespiy terbiyelesh merkizi” ni ziyaret qildurghan. Emma bu orunlar bezi chet'el taratqulirida guman qozghighan. Roytérs agéntliqi shu qétimqi ziyaret heqqidiki xewiride, özlirining xitay hökümiti körsitishni xalighan yerlerni ziyaret qilalighanliqini bildürgen. Da'iriler ötken qétimliq muxbirlar guruppisigha roytérs agéntliqining muxbirini qatnashturghan bolsimu, lékin bu qétim birmu gherb muxbirini qatnashturmighan.

“Junggo xewerler” torining bildürüshiche, bu qétimqi ziyaretke türkiye, misir, pakistan, afghanistan, ban'gladesh, sirilanka qatarliq 6 döletning 12 muxbiri, tehriri, riyasetchi we fotografliri teklip qilin'ghan bolup, ular tunji qedemde sanji shehirini ziyaret qilghan. Yuqiriqi döletlerning xitay bilen munasiwiti nahayiti qoyuq bolup, bu döletler xitayning 3 milyondek musulmanni yighiwélish lagérlirigha qamap, ulargha qarita “Medeniyet qirghinchiliqi” élip bérishigha süküt qilish bilen eyiblinip kelgen.

“Junggo xewerler” torining bildürüshiche, muxbirlar guruppisi 11‏-yanwar küni sanjidiki ziyaritini tügitip, kéyinki ziyaret békitige qarap yürüp ketken. Bu qétimqi muxbirlar guruppisining terkibide türkiye atw téléwiziye qanilining muxbirining barliqi diqqet qozghidi. Türkiyening “Zirwe shirketler guruhi” gha qarashliq mezkur téléwiziye qanilining erodoghan hökümiti bilen yéqin munasiwiti barliqi melum. Atw téléwiziye qanili bilen “Zirwe shirketler guruhi” ning “Sabah” géziti burun Uyghur mesiliside xitayni qollaydighan xewerlerni bergen. “Junggo xewerler” torining bildürüshiche, muxbirlar guruppisi sanjidiki ziyaritidin axirlashturghandin kéyin, ikkinchi qedemde qeshqer bilen artushni ziyaret qilidiken.