Хитай һөкүмити уйғур дияри вәзийитини кәлгән саяһәтчиниң сани билән нормал көрситишкә урунмақта

Мухбиримиз алим сейитоф
2019-04-09
Елхәт
Пикир
Share
Принт

Хитай һөкүмити йеқиндин бери уйғур дияриниң сиясий вәзийитини дуняға нормал қилип көрситиш үчүн охшаш болмиған район яки дөләтләрдин кәлгән саяһәтчиләрниң сани һәр йили милйонлап көпәймәктә дегән шәкилдә кәң көләмлик тәшвиқ қилмақта.

Хитай һөкүмитиниң милләтчи зувани болған «дуня вақти гезити» ниң дүшәнбә күнидики хәвиридә, шинҗаң һөкүмитиниң мушу баһарда сирттин саяһәтчиләрни җәлп қилиш үчүн 342 хил саяһәт паалийити орунлаштурғанлиқи билдүрүлгән. Мақалида ейтилишичә, буниң нәтиҗисидә ичкиридин нурғун хитай саяһәтчиләр уйғур диярини зиярәт қилған. Униң бир қисимлири өрүк чечики байримиға берип, бу гүзәл мәнзиридин юртидики хитай достлирини һәйран қалдурған.

Хитай һөкүмити уйғур диярида саяһәт паалийәт түрлириниң вә саяһәтчиләр саниниң көплүки арқилиқ бу райондики сиясий вәзийәтни нормал вә хәлқини хатирҗәм дәп иҗабий тәшвиқат қиливатқан бир вақитта, «ню-йорк вақти» гезитиниң 3 мухбири өзиниң уйғур диярида йеқинда берип көргәнлирини рәсим вә син билән елан қилип, темисини «хитай һөкүмитиниң бир шәһәрни түрмигә айландуруши» дәп қойған иди. Бу мухбирлар хотәнни зиярәт қилған болуп, улар хитай һөкүмитиниң бу шәһәрни бир үсти очуқ түрмигә айландурғанлиқини билдүргән. Бу мухбирлар қәшқәрниң бир уйғурлар олтурақлашқан қисмини зиярәт қилимиз дегән вақтида, хитай сақчилири һәтта ялған машина һадиси пәйда қилип улар маңмақчи болған йолни пүтүнләй тосувәткән.

Хитай һөкүмити бу мухбирларниң уйғур дияридики һәқиқий вәзийәтни билип қелишидин әнсирәп, уларниң зияритигә қәстән тосқунлуқ яратқан болсиму, әмма булар йәнила уйғурларниң қанчилик дәриҗидә дәпсәндә болуватқанлиқини ениқ биләлигән. Шу сәвәбтин, хитай һөкүмити уйғур дияридики вәзийәтни дуняға наһайити нормал қилип көрситишкә урунсиму, әмма униң көз-боямчилиқи йәнила хәлқара җәмийәтни қайил қилалмиған.

Пикирләр (0)
Share
Толуқ бәт