Xitay hökümiti Uyghur diyari weziyitini kelgen sayahetchining sani bilen normal körsitishke urunmaqta

Muxbirimiz alim séyitof
2019-04-09
Élxet
Pikir
Share
Print

Xitay hökümiti yéqindin béri Uyghur diyarining siyasiy weziyitini dunyagha normal qilip körsitish üchün oxshash bolmighan rayon yaki döletlerdin kelgen sayahetchilerning sani her yili milyonlap köpeymekte dégen shekilde keng kölemlik teshwiq qilmaqta.

Xitay hökümitining milletchi zuwani bolghan "Dunya waqti géziti" ning düshenbe künidiki xewiride, shinjang hökümitining mushu baharda sirttin sayahetchilerni jelp qilish üchün 342 xil sayahet pa'aliyiti orunlashturghanliqi bildürülgen. Maqalida éytilishiche, buning netijiside ichkiridin nurghun xitay sayahetchiler Uyghur diyarini ziyaret qilghan. Uning bir qisimliri örük chéchiki bayrimigha bérip, bu güzel menziridin yurtidiki xitay dostlirini heyran qaldurghan.

Xitay hökümiti Uyghur diyarida sayahet pa'aliyet türlirining we sayahetchiler sanining köplüki arqiliq bu rayondiki siyasiy weziyetni normal we xelqini xatirjem dep ijabiy teshwiqat qiliwatqan bir waqitta, "Nyu-york waqti" gézitining 3 muxbiri özining Uyghur diyarida yéqinda bérip körgenlirini resim we sin bilen élan qilip, témisini "Xitay hökümitining bir sheherni türmige aylandurushi" dep qoyghan idi. Bu muxbirlar xotenni ziyaret qilghan bolup, ular xitay hökümitining bu sheherni bir üsti ochuq türmige aylandurghanliqini bildürgen. Bu muxbirlar qeshqerning bir Uyghurlar olturaqlashqan qismini ziyaret qilimiz dégen waqtida, xitay saqchiliri hetta yalghan mashina hadisi peyda qilip ular mangmaqchi bolghan yolni pütünley tosuwetken.

Xitay hökümiti bu muxbirlarning Uyghur diyaridiki heqiqiy weziyetni bilip qélishidin ensirep, ularning ziyaritige qesten tosqunluq yaratqan bolsimu, emma bular yenila Uyghurlarning qanchilik derijide depsende boluwatqanliqini éniq bileligen. Shu sewebtin, xitay hökümiti Uyghur diyaridiki weziyetni dunyagha nahayiti normal qilip körsitishke urunsimu, emma uning köz-boyamchiliqi yenila xelq'ara jem'iyetni qayil qilalmighan.

Toluq bet