Xitay da'iriliri lagér sirtidiki Uyghurlargha qarita “Kespiy terbiyelesh” kölimini kéngeytishke kirishken

Xitay hökümiti Uyghur rayonida yighiwélish lagérlirining sirtidiki Uyghurlargha qarita “Kespiy terbiyelesh” élip bérip, ularning “Ishqa orunlishish” salmiqini ashurmaqchi iken.

“Shinxu'a agéntliqi” ning 11‏-mart xewer qilishiche, da'iriler Uyghur aptonom rayonida “Kespiy terbiyelesh” ning kölimini kéngeytip, sheher-yézilardiki “Ishqa orunlishishni ümid qilidighan” emgek küchlirining hemmisini birdek “Kespiy terbiyelesh” da'irisige élishni qarar qilghan. Mezkur siyaset xelq'ara jem'iyetning diqqiti Uyghur rayonidiki yighiwélish lagérlirigha merkezleshken bir waqitta élan qilindi.

B d t ning kishilik hoquq aliy komissari mishél bashiléyt ötken hepte kishilik hoquq kéngishide doklat bérip, xitayni b d t ning Uyghur rayonida tekshürüsh élip bérishigha yol qoyushqa chaqirghan idi. Kishilik hoquq teshkilatlirining ilgiri sürüshiche, xitay hökümiti teriplewatqan “Kespiy terbiyelesh merkezliri” uning yighiwélish lagérlirini perdazlashtiki bir wasitisi xelq'arani qaymuqturush rolini oynimaqta iken

Amérika hökümiti nöwette bu lagérlarda 800 mingdin 2 milyon'ghiche Uyghur we bashqa milletlerning tutup turuluwatqanliqini ilgiri sürüp keldi.

Shinxu'a agéntliqining xewiride bildürülüshiche, da'iriler buningdin kéyinki “Kespiy terbiyelesh” obyéktini Uyghur élining jenubidiki 3 wilayet, bir oblast we ili qazaq aptonom oblastini merkez qilip, aliy mektepni püttürüp ishqa orunlishalmighan, toluqsiz we toluq ottura mektepni püttürüp yuqirilap oquyalmighan emgek küchlirige we yéza éshincha emgek küchlirige kéngeytidiken.

Xewerde, da'irilerning 2018‏-yili Uyghur aptonom rayonida bir milyon 270 ming adem qétimdin artuq “Kespiy terbiyelesh” élip barghanliqi, uning bu yilliq pilani bir milyon 100 ming adem qétim “Kespiy terbiye” élip bérish ikenliki bildürülgen.