Lagérdiki tutqunlarning türmige yötkiliwatqanliqi köplep melum bolmaqta

Muxbirimiz eziz
2019-10-08
Élxet
Pikir
Share
Print

Uyghur diyaridiki lagérlargha qamalghan tutqunlarning qandaq rohiy we jismaniy qiynaqlargha duch kéliwatqanliqi heqqide köpligen uchurlar melum boluwatqanda yene bir türküm lagér tutqunlirining uruq-tughqanliri hazir barghanséri köp kishilerning lagérdin türmilerge yötkiliwatqanliqini ashkara qildi.

"Döletlik xelq radiyosi" ning muxbiri émiliy féng imzasida 8-öktebir élan qilin'ghan bu heqtiki maqalida körsitilishiche, ular qazaqistanda ziyaret qilghan Uyghur we qazaqlardin 26 kishi özlirige melum bolghan uchurlar asasida lagérdiki tughqanlirining qoyuwétilmigenlikini, eksiche ularning resmiy türmilerge jaza mudditi öteshke yötkelgenlikini bildürgen. Melum bolushiche, "Lagérdin qoyuwétildi" dégen kishilermu qattiq nazaret astida iken.

Ziyaret qilin'ghan bu kishiler birdek lagér tutqunlirining normal diniy étiqad pa'aliyetliri üchün lagérgha élip kétilgenliki, ularning herqachan rohiy we jismaniy bésim, shundaqla éghir tehditler astida "Terbiye" alidighanliqi, bir qisimlirining "Terbiyeleshni püttürgen" din kéyin zawutlargha ishqa yötkelgenlikini sözlep bergen.

Radiyomizmu ilgiri bu heqte köplep xewer bergen bolup, qazaqistandiki bu kishilerning shahitliq bayanliri bizning ilgiriki xewerlirimizning chinliqini yene bir qétim delillidi.

Toluq bet