Уйғур елидә йолға қоюлуватқан лагер түзүминиң пиланлиғучисиниң җу хәйлән икәнлики ашкариланди

Мухбиримиз ирадә
2019-11-25
Елхәт
Пикир
Share
Принт

24-Ноябир күни, уйғур елидики лагерларға аит ашкариланған йеңи бир түркүм мәхпий һөҗҗәтләрдә уйғур аптоном райониниң сабиқ муавин партком секретари җу хәйлунниң имзаси болуши диққәт қозғиди.

Бу һәқтә журналист бәттений аллен ибраһиминиң «хәлқаралиқ тәкшүрүш ахбаратчилири бирләшмиси» тор бетидә елан қилишичә, уйғур елидә лагерларни қуруш, уни башқуруш, тутқунларни контрол қилиш вә омумйүзлүк һалда назарәт системисини йолға қоюш қатарлиқ пиланлар һәммиси җу хәйлунгә аит икән.

Униңда көрситилишичә, бу лайиһәләрдә һәтта тутқунларниң һаҗәтхана ишлитидиған вақитлирини контрол қилиш, қандақ шараитта тутқунларниң уруқ-туғқанлири билән көрүшүшигә иҗазәт бериш, уларниң лагердин қоюп берилиши үчүн қайси тәләпләр орундалған болуш қатарлиқлар бирму-бир шәрһләнгән икән. Көрсәтмидә йәнә, тутқунларниң қечип кетишиниң қәтий алдини елиш йолйоруқи берилгән болуп, униңда тутқунларниң дәрс вақти, тамақ, һаҗәт, тазилиқ вақти вә давалиниш вә туғқанлири билән көрүшүш вақитлирида қечип кетишиниң алдини елиш үчүн қоллинилидиған тәдбирләр бекитип берилгән, тутқунларни адәттә «кесәллик вә башқа алаһидә сәвәбләр болмай туруп» қоюп беришкә болмайдиғанлиқи дейилгән.

Бирләшмә агентлиқиниң бу һәқтики хәвиридә көрситилишичә, лагерларни идарә қилишқа аит инчикә һазирланған бу һөҗҗәтләрдин җу хәйлунниң бу лагерларни пиланлашта вә уни иҗра қилишта һалқилиқ рол ойниғанлиқи мәлум болған. Бирақ җу хәйлун бирләшмә агентлиқиниң бу һәқтики соаллириға җаваб беришни рәт қилған.

Җу хәйлун әсли җияңсу өлкисидин болуп, мәдәнийәт инқилаби сәвәбидин балилиқ мәзгилидила қағилиқ наһийәсигә кәлгән вә қағилиқ наһийәсигә йәрлишип қалған икән. Бирләшмә агентлиқи хәвиридә, уни йеқиндин билидиған вә истанбулда яшайдиған бир уйғурниң сөзлиригә асасән, җу хәйлунниң уйғурчини худди бир уйғурдәкла сөзләйдиған бири икәнликини, интайин һийлигәр вә залимлиқи билән тонулған җу хәйлунниң хитай һөкүмитиниң җәнубий шинҗаңни идарә қилиштики әң һалқилиқ адими болуп кәлгәнликини қәйт қилған. У 2016-йили чен чөәнго кәлгәндин кейин, чен чүәнгониң «оң қол адими» болуп, пиланни ишқа кириштүргән. Җу хәйлун зор көләмлик тутқунни йолға қоюш, кимләрни тутқун қилиш, сақчи органлириниң назарәт системилирини ишқа кириштүрүш арқилиқ чәтәлләргә чиқип киргәнләрни, бир қисим телефон әплирини ишләткәнләрни яки мәлум сәвәб билән «гуманлиқ» дәп қаралған кишиләрни тәкшүрүш астиға елиш қатарлиқ йол-йоруқларни чүшүргән икән.

Пикирләр (0)
Share
Толуқ бәт