Lagérlar weziyiti muhajirettiki Uyghur sha'irlirining shé'irliri arqiliq tonushturuldi

Uyghur rayonidiki yighiwélish lagérlirining weziyitini dunyagha tonutushta ilmiy tetqiqatliri we ijtima'iy pa'aliyetliri bilen sepning aldida kétiwatqan amérikiliq tetqiqatchi darrén baylér aldinqi küni élan qilghan lagérlar weziyiti heqqidiki eng yéngi maqaliside muhajirettiki bir qisim Uyghur sha'irlirining shé'irliri we tesiratliri arqiliq tonushturdi.

Tetqiqatchi darrén baylérning “Sapchayna” (SupChina) torida 6‏-mart küni élan qilin'ghan maqaliside sha'ire muyesser abdul'ehedning “Otning ichige qaytish” namliq shé'iri bilen sha'ir abdushükür memetning “Kéche” namliq shé'irini terjime we tehlil qilip, Uyghur rayondiki yighiwélish lagérliri seweblik uruq-tughqanlirining iz-dérikini alalmaywatqan muhajirettiki Uyghurlarning achchiq oy-xiyallirini yorutup bergen.

Mezkur sha'irlarning qismen shexsiy kechürmishliri we a'ile-tawabi'atlirining ehwali heqqide melumat bérilgen bu maqaligha tutqundiki sen'etkar abduréhim héyt, naxsha cholpini ablajan awut, sha'ire chimen'gül awut, proféssor tashpolat téyip, edib abduqadir jalalidin we obzorchi yalqun rozi qatarliq Uyghur serxillirining éghizliri téngilghan halettiki resimliri kirishtürülgen.

Maqalining axirida türkiyediki musteqil tetqiqatchi abduweli ayupning “Baghrimda baraqsan qisas tikini” mawzuluq shé'iri we bu shé'ir bilen aptorning shexsiy kechmishliri arisidiki baghlinish chüshendürülgen.