Литва парламенти "уйғур қирғинчилиқи" һәққидә рәсмий қарар алди

Мухбиримиз әзиз
2021-05-20
Share
Литва парламенти
Photo: RFA

Литва парламенти хитай һөкүмитиниң уйғурларға қаратқан бастуруш сиясәтлириниң характерини рәсмий һалда "инсанийәткә қарши җинайәт" вә "уйғур қирғинчилиқи" дәп бекитти.

Литва дөләтлик радийо-телевизийә ториниң 20-майдики хәвиридә ейтилишичә, литва парламенти мутләқ үстүнлүк билән қарар мақуллап: "хитай һөкүмитиниң зор көләмлик, системилиқ болған инсанийәткә қарши җинайәтлирини әйибләйдиғанлиқи" ни билдүргән. Шундақла бирләшкән дөләтләр тәшкилати (б д т) вә явропа иттипақини "уйғур қирғинчилиқи һәмдә инсанийәткә қарши җинайәтләр" һәққидики қануний тәкшүрүшни тездин башлашқа чақириқ қилған. Қарарда йәнә хитай һөкүмитини бу хил қирғинчилиқни тохтитиш, қанунсиз ичкий әзалар содисиға хатимә бериш, барлиқ виҗдан мәһбуслирини дәрһал қоюветиш һәмдә лагерларни тездин тақашқа үндигән.

Литва парламентиниң "уйғур қирғинчилиқи" һәққидики қарари рәсмий мақуллуқтин өткәндин кейин, хитай әлчиханиси тездин бу қарарға қарши чиқип буниң бир мәйдан "сахтилиқ вә ялған учурларни асас қилған яман ғәрәзлик сиясий оюн" болғанлиқини тәкитлигән. Шундақла бу қарарниң өзлириниң уйғур дияридики муқимлиқ яритиш, терорлуқ вә әсәбийликкә қарши турушта қолға кәлтүргән "утуқлири" ға қара чаплаш икәнликини һәмдә "қопаллиқ билән башқа дөләтниң ички ишиға арилашқанлиқ" болидиғанлиқини билдүргән.

Литва парламентиниң әзаси довел сакаляна бу һәқә сөз қилип: "биз демократийәни һемайә қилғанлиқимиз үчүн бу қарарни алдуқ. Чүнки биз өтмүштә комунистик түзүмниң 50 йиллиқ асаритини баштин кәчүргән," дегән.

Мәлум болушичә, америка һөкүмити "уйғур қирғинчилиқи" һәққидики қарарни рәсмий елан қилғандин кейин канада, голландийә, әнглийә қатарлиқ дөләтләрниң парламентлири мушу хилдики қарарларни мақуллиған иди. Әмди балтиқ деңизи бойидики литва парламентиниңму "уйғур қирғинчилиқи" һәққидә рәсмий қарар елиши уйғурлар дуч келиватқан бастурушқа қарши дунявий бирликсәпниң барғансери кеңийиватқанлиқиниң бир мисали, дәп қаралмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт