Litwa parlaménti "Uyghur qirghinchiliqi" heqqide resmiy qarar aldi

Muxbirimiz eziz
2021-05-20
Share
Litwa parlaménti
Photo: RFA

Litwa parlaménti xitay hökümitining Uyghurlargha qaratqan basturush siyasetlirining xaraktérini resmiy halda "Insaniyetke qarshi jinayet" we "Uyghur qirghinchiliqi" dep békitti.

Litwa döletlik radiyo-téléwiziye torining 20-maydiki xewiride éytilishiche, litwa parlaménti mutleq üstünlük bilen qarar maqullap: "Xitay hökümitining zor kölemlik, sistémiliq bolghan insaniyetke qarshi jinayetlirini eyibleydighanliqi" ni bildürgen. Shundaqla birleshken döletler teshkilati (b d t) we yawropa ittipaqini "Uyghur qirghinchiliqi hemde insaniyetke qarshi jinayetler" heqqidiki qanuniy tekshürüshni tézdin bashlashqa chaqiriq qilghan. Qararda yene xitay hökümitini bu xil qirghinchiliqni toxtitish, qanunsiz ichkiy ezalar sodisigha xatime bérish, barliq wijdan mehbuslirini derhal qoyuwétish hemde lagérlarni tézdin taqashqa ündigen.

Litwa parlaméntining "Uyghur qirghinchiliqi" heqqidiki qarari resmiy maqulluqtin ötkendin kéyin, xitay elchixanisi tézdin bu qarargha qarshi chiqip buning bir meydan "Saxtiliq we yalghan uchurlarni asas qilghan yaman gherezlik siyasiy oyun" bolghanliqini tekitligen. Shundaqla bu qararning özlirining Uyghur diyaridiki muqimliq yaritish, térorluq we esebiylikke qarshi turushta qolgha keltürgen "Utuqliri" gha qara chaplash ikenlikini hemde "Qopalliq bilen bashqa döletning ichki ishigha arilashqanliq" bolidighanliqini bildürgen.

Litwa parlaméntining ezasi dowél sakalyana bu heqe söz qilip: "Biz démokratiyeni hémaye qilghanliqimiz üchün bu qararni alduq. Chünki biz ötmüshte komunistik tüzümning 50 yilliq asaritini bashtin kechürgen," dégen.

Melum bolushiche, amérika hökümiti "Uyghur qirghinchiliqi" heqqidiki qararni resmiy élan qilghandin kéyin kanada, gollandiye, en'gliye qatarliq döletlerning parlaméntliri mushu xildiki qararlarni maqullighan idi. Emdi baltiq déngizi boyidiki litwa parlaméntiningmu "Uyghur qirghinchiliqi" heqqide resmiy qarar élishi Uyghurlar duch kéliwatqan basturushqa qarshi dunyawiy birliksepning barghanséri kéngiyiwatqanliqining bir misali, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet