Blinkén xitayning létwagha bolghan bésimigha qarita amérikaning létwa bilen polattek hemkarliqi barliqini tekitligen

Amérika tashqiy ishlar ministiri antoni blinkén xitayning létwagha bésim ishlitishige inkas bildürüp, amérikaning létwani qollaydighanliqi, amérikaning shimali atlantik ehdi teshkilatdiki bu ittipaqdishi bilen polattek hemkarliqi barliqini tekitligen. Blinkén bu sözlerni létwa parlaménti qarar maqullap, xitayning Uyghurlargha “Irqiy qirghinchiliq” qilghanliqini étirap qilshi, shundaqla uning teywende wakaletxana qurushi, xitayni qattiq bi'aram qilip létwagha qarita qattiq bésim qiliwatqan bir waqitta éytqan.

Xitay 10-awghust küni létwada turushluq elchisini qayturup ketken, shundaqla létwaningmu béyjingda turushluq elchisini qayturup kétishini telep qilghan. Buning aldida létwa parlaménti qarar maqullap, xitayning Uyghurlargha tutqan mu'amilisini “Irqiy qirghinchiliq” dep atighan shundaqla b d t ning Uyghur élida tekshürüsh élip bérishini we yarwropa ittipaqining béyjing bilen bolghan munasiwitini qaytidin közdin kechürüshini telep qilghan idi.

Amérika tashqiy ishlar ministirliqining élan qilishiche, blinkén 21-awghust létwa tashqiy ishlar ministiri gabrélyus lendisbérgis bilen téléfonda sözleshkende ikki terep munasiwitining “Küchi we kenglik da'irisini mu'ayenleshtürgen.” amérika tashqiy ishlar ministirliqining bu heqtiki yazma bayanatida: “Blinkén xitay xelq jumhuriyitining zorlash xaraktérliq qilmishlirigha qarita shimaliy atlantik ehdi teshkilatidiki ittipaqdishimiz we yawropa ittipaqidiki shérikimiz létwa bilen bolghan polattek hemkarliqimizni tekitlidi,” déyilgen.