Londondiki xitay elchixanisining köchürülüshi qarshiliqqa duch keldi

Muxbirimiz eziz
2020-09-29
Élxet
Pikir
Share
Print

Xitay hökümiti yéqinda londondiki bash elchixanisini sherqiy london rayonigha köchürmekchi bolghanda Uyghurlar mesilisi we xongkongdiki démokratiyeni basturushni chöridigen küchlük qarshiliqqa duch keldi.

"Muhapizetchi" gézitining 28-séntebirdiki xewiride éytilishiche, londonning gherbiy qismigha jaylashqan xitay elchixanisi londonning sherq teripidiki "Xamlét munari" rayonigha köchmekchi bolghan. Emma bu rayon en'gliyediki musulmanlar eng merkezlik olturaqlashqan jay bolup, pütkül rayon ahalisining 38 pirsenti musulmanlar iken. Erkin démokratlar we konsérwatiplar shu küni ötküzülgen yilliq yighinda xitay elchixanisining bu rayon'gha köchürülüshige qarshi turush mezmunida muhakime uyushturghan. Erkin démokratlar partiyesidin bolghan komitét ezasi rabina xan bu heqte söz qilip "Biz barliq ezalarni öz elchixanisini bu jaygha köchürmekchi bolghan xitay hökümitige ochuq mektup yollap, ularning Uyghurlarni basturush qilmishini qet'iy eyibleydighanliqimizni bildürüshke chaqirduq" dégen.

Gerche muhakimide xitay elchixanisining köchürülüshini ret qilish heqqide qarar élinmighan bolsimu, xitay hökümitining Uyghurlarni basturush herikitining elchixana köchürülmekchi bolghan jaydiki ahalini bi'aram qilidighanliqi alahide tekitlen'gen. Xitay hökümitining bash elchixanini köchürmekchi bolghanliqi heqqidiki xewer 2018-yili deslepki qedemde melum bolghanda buni alqishlaydighanliqini bildürgen siyasiyonlarning biri mark baynés bu heqte toxtilip "Men hazir buninggha pütün küchüm bilen qarshi turimen. Méningche nurghun kishilermu buninggha qarshi turidu" dégen.

"Xamlét munari" rayonluq hökümetning bayanatchisining bildürüshiche, xitay elchixanisi nöwette iltimas basquchida turuwatqan bolup, buning axirqi hésabta toluq ishqa éshishigha xéli waqit kétidighanliqini bildürgen.

Toluq bet