Ма шиңруй уйғур елида сиясий назарәтни конкретлаштуруш вә нормаллаштурушни тәләп қилған

Уйғур аптоном районлуқ парткомниң секритари ма шиңруй 19-январ уйғур аптоном районлуқ интизам тәкшүрүш комитетиниң йиллиқ йиғинида сөз қилип, уйғур елида сиясий назарәтни күчәйтиш, конкретлаштуруш, ениқлиқ дәриҗисини юқири көтүрүш вә сиясий назарәтни нормаллаштурушни тәләп қилған.

Йиғинда ма шиңруй, хәлқараниң қаттиқ бесимиға ‍учраватқан хитайниң “шинҗаң сиясити”дә өзгириш болмайдиғанлиқидин бишарәт берип, “партийәниң йеңи дәврдики шинҗаңни башқуруш истиратегийәсини толуқ вә тоғра әмәлийләштүрүш, иҗтимаий муқимлиқ вә узун муддәтлик әминлик омуми нишаниға мәркәзлишиш”ни тәкитлигән.

Бу қетимқи йиғин уйғур аптоном районлуқ хәлқ қурултийиниң 18-январ өткүзүлгән 14-нөвәтлик 1-қетимлиқ йиғини уйғур аптоном районлиқ һөкүмәт вә хәлқ қурултийиниң йеңи рәһбәрлирини бекитип арқидинла өткүзүлгән. Йиғинда ма шиңруй, уйғур аптоном районниң “черикликкә қарши туруш күришидики йеңи вәзийәтни ениқ тонуп, партийәни омумйүзлик қаттиқ башқурушниң истратегийәлик орунлаштурушини тәврәнмәй иҗра қилиш”ни тәләп қилған болсиму, лекин у районниң черикликкә қәрши қандақ “йеңи вәзийәткә” дуч кәлгәнликини ейтмиған.

Хитай һөкүмити 2017-башланған чоң тутқунда, нурғун уйғур кадирлирини чериклик, парихорлуқ вә “икки йүзлимичилик”кә бағлап тазилиған иди.

Йиғинда ма шиңруй мундақ дегән: “сиясий назарәтниң конкретлиқи, ениқлиқи вә нормаллишишини илгири сүрүп, нуқтилиқ кишиләр вә нуқтилиқ һадисиләргә диққәт қилиш, сиясий интизам вә қаидиләрни қаттиқ иҗра қилип, сиясий тәкшүрүшниң өткүр қиличлиқ ролини җари қилдуруш керәк.”

19-январ өткүзүлгән бу йиғинға буниңдин бир күн аввал уйғур аптоном районлиқ хәлқ қурултийиниң мудирлиқиға бекитилгән зумрәт обул билән уйғур аптоном районлуқ һөкүмәтниң рәисликигә қайта бекитилгән әркин туниязларму қатнашқан.