Ma shingruy Uyghur élida siyasiy nazaretni konkrétlashturush we normallashturushni telep qilghan

Muxbirimiz erkin
2023.01.20

Uyghur aptonom rayonluq partkomning sékritari ma shingruy 19-yanwar Uyghur aptonom rayonluq intizam tekshürüsh komitétining yilliq yighinida söz qilip, Uyghur élida siyasiy nazaretni kücheytish, konkrétlashturush, éniqliq derijisini yuqiri kötürüsh we siyasiy nazaretni normallashturushni telep qilghan.

Yighinda ma shingruy, xelq'araning qattiq bésimigha ‍uchrawatqan xitayning “Shinjang siyasiti”de özgirish bolmaydighanliqidin bisharet bérip, “Partiyening yéngi dewrdiki shinjangni bashqurush istiratégiyesini toluq we toghra emeliyleshtürüsh, ijtima'iy muqimliq we uzun muddetlik eminlik omumi nishanigha merkezlishish”ni tekitligen.

Bu qétimqi yighin Uyghur aptonom rayonluq xelq qurultiyining 18-yanwar ötküzülgen 14-nöwetlik 1-qétimliq yighini Uyghur aptonom rayonliq hökümet we xelq qurultiyining yéngi rehberlirini békitip arqidinla ötküzülgen. Yighinda ma shingruy, Uyghur aptonom rayonning “Chériklikke qarshi turush kürishidiki yéngi weziyetni éniq tonup, partiyeni omumyüzlik qattiq bashqurushning istratégiyelik orunlashturushini tewrenmey ijra qilish”ni telep qilghan bolsimu, lékin u rayonning chériklikke qershi qandaq “Yéngi weziyetke” duch kelgenlikini éytmighan.

Xitay hökümiti 2017-bashlan'ghan chong tutqunda, nurghun Uyghur kadirlirini chériklik, parixorluq we “Ikki yüzlimichilik”ke baghlap tazilighan idi.

Yighinda ma shingruy mundaq dégen: “Siyasiy nazaretning konkrétliqi, éniqliqi we normallishishini ilgiri sürüp, nuqtiliq kishiler we nuqtiliq hadisilerge diqqet qilish, siyasiy intizam we qa'idilerni qattiq ijra qilip, siyasiy tekshürüshning ötkür qilichliq rolini jari qildurush kérek.”

19-Yanwar ötküzülgen bu yighin'gha buningdin bir kün awwal Uyghur aptonom rayonliq xelq qurultiyining mudirliqigha békitilgen zumret obul bilen Uyghur aptonom rayonluq hökümetning re'islikige qayta békitilgen erkin tuniyazlarmu qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.