Ma shingruy Uyghur rayonida xitayperes ademlerni berpa qilish heqqide yolyoruq bergen

Washin'gtondin muxbirimiz uyghar teyyarlidi
2024.01.30

“Xitay tor” ning 2024-yili 1-ayning 24 kündiki mexsus xewige asaslan'ghanda, ma shingruy aptonom rayonluq siyasiy kéngeshning yighinida medeniyet-sen'et, axbarat-neshriyat sahesining birleshme muzakirisige qatnashqan we yighinda söz qilip, xitay jem'iyitining asasiy éngigha emel qilip, idiye we medeniyet asasini mustehkemlesh kéreklikini tekitligen.

Ma shingruy mundaq dégen: “Shinjangni medeniyet bilen ozuqlandurush partiyining yéngi dewrdiki shinjangni bashqurush istratégiyesining muhim terkibiy qismi, u uzun muddetlik tinchliq we muqimliqqa munasiwetlik négizlik, asasiy we uzun muddetlik wezipe. Kishilerning qelbini xitay éngigha mujessem qilish, yéngi kishilerni terbiyelesh kérek” dégen.

Xitay hökümitining bu xildiki “Shinjangni medeniyet bilen ozuqlandurush” chüshenchisi arqiliq Uyghurlarni xitaylashturush we éritip tügitish urunushi Uyghur élide oxshimighan shekillerde qattiq qolluq bilen ijra qilinip kelgenliki melum.

Kishilik hoquqni közitish teshkilatining tetqiqatchisi maya wang “Shinjangni medeniyet arqiliq ozuqlandurush qurulushi” toghruluq qilghan sözide, “Xitay hökümitining atalmish ‛medeniyet qurulushi‚ Uyghurlarni ochuqtin ochuq xitaylashturush, bu emeliyette insaniyetke qarshi jinayet tüsini alghan” dégen.

Mutexessislerning bildürüshiche, nöwette xitay hökümitining Uyghur élining chet rayonlardiki yéza-qishlaqlirighiche Uyghurlarni mejburiy assimilyatsiye qilish, mejburiy xitaylashturush herikiti téxi ularning kütkinidek netije bermigen, shu wejidin xitay hökümiti buningdin kéyin bu heriketni téximu kücheytishi éhtimali bar iken. “Kishilerning qelbini xitay éngigha mujessem qilish, yéngi kishilerni terbiyelesh” xitayning bu siyasitige misal bolalaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.