Ma shingruy qeshqer we qizilsudiki ziyaritide muqimliq, xitay tili ma'aripi we “Jungxu'a éngi” ni kücheytishni tekitligen

Muxbirimiz irade
2021.12.30
Share on WhatsApp
Share on WhatsApp

Xitayning Uyghur rayonigha yéngidin teyinligen partkom sékritari ma shingruy qeshqer wilayiti we qizilsu oblastida ziyarette bolghan.

Xitayning “Shinjang géziti” tarqatqan xewerge qarighanda, ma shingruy 29-dékabirdin 30-dékabirghiche qeshqer wilayiti we qizilsu qirghiz aptonom oblastida tekshürüsh élip barghan. U bu jeryanda xitay dölet re'isi shi jinpingning atalmish “Shinjang xizmiti” toghrisidiki muhim sözini izchillashturush we partiyening yéngi dewrdiki shinjangni idare qilish istratégiyesini toluq yolgha qoyush, jem'iyetning muqimliqi we uzun muddetlik eminlikni omumiy nishan süpitide ching tutush qatarliqlarni tekitligen.

Ma shingruy ziyariti dawamida sana'et rayonliri, shirketler, yéza-kent mehelle komitétliri we mektepler qatarliq oxshimighan orunlarni ziyaret qilip, “Muqimliqqa, jem'iyet amanliqigha, iqtisadiy tereqqiyatqa dawamliq kapaletlik qilish” heqqide bir qatar yolyoruqlarni bergen. Bolupmu uning qeshqer unwérsitéti, aqto nahiyelik téxnika terbiyelesh mektipi we qeshqer kona sheher nahiyesidiki toqquzaq baziri merkizi bashlan'ghuch mektipide qilghan “Kespiy ma'aripta ixtisasliq xadimlarni yétishtürüsh kérek. Yashlar, déhqanlar we charwichilar kespiy maharet terbiyesini qobul qilishi kérek. Asasiy ma'arip choqum éniq bolushi kérek, idiye we siyasiy terbiyeni kücheytip, sotsiyalistik qimmet qarishidiki ma'aripni kücheytishimiz we jungxu'a milliti éngidiki ma'aripni kücheytish kérek,” dégen sözliri diqqet qozghighan.

Chet ellerdiki közetküchiler ma shingruyning qeshqer we qizilsudiki ziyaritide perez qilin'ghinidek “Kona muqamni towlap” Uyghur élidiki yuqiri bésimliq teqip siyasiti, lagér tüzümi, assimlatsiye si'iyasetlirini oxshash dawam qilidighanliqini namayen qilghanliqini bildürmekte.

Ularning éytishiche, ma shingruyning yéngi wezipige olturup tunji sheher atlap qilghan ziyaritini Uyghurlar eng zich olturaqlashqan qeshqer we qizilsudin bashlishi, xitay hökümitining yoqiri bésimliq siyasitining nishanida yenila jenubni kontrol qilishning asasliq orunni igileydighanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.