Уйғур елидә мал баһасиниң өрләп кетиши сәвәблик хәлқниң әмәлий кирими төвәнлигән

Уйғур елидә мал баһасиниң шиддәтлик өрләп кетиши сәвәблик хәлқниң әмәлий кирими төвәнләп кәткән. Уйғурбиз ториниң хитай статистика идарисидин нәқил кәлтүрүп хәвәр қилишичә, өткән йерим йилда уйғур елидики шәһәр, базар аһалилириниң сап кирими намда өскән болсиму, бирақ 2‏-пәсилдә 1‏-пәсилгә қариғанда сап кирими 6.0 Пирсәнт, әмәлий кирими 5.0 Пирсәнт төвәнлигән.

Мутәхәссисләрниң қаришичә, уйғур аптоном районида мал баһасиниң изчил өрләп кетиши пуқраларниң әмәлий кириминиң чүшүп кетишини кәлтүрүп чиқарған.

Хитай дөләтлик статистика идариси шинҗаң тәкшүрүш әтритиниң муавин мәсули фән йүҗин, өткән йерим йилда аптоном районда мал баһасиниң өрлиши хитай бойичә алдинқи орунни игилигәнликини, болупму, шәһәрләргә қариғанда йезиларда юқирилиқини билдүргән. Бәзи көзәткүчиләрниң илгири сүрүшичә, хитай көчмәнлириниң уйғур елигә көпләп еқип кириши уйғур елидә мал баһасиниң изчил юқири болушидики сәвәбләрниң бири. Униң үстигә хитай һөкүмитиниң көчмәнләрни йөләш сиясити хитайлар билән уйғурлар арисидики кирим пәрқини чоңайтивәткән.

Уйғурбиз ториниң хәвиридә, гөш қатарлиқ истемал буюмлириниң баһасиниң учқандәк өрләп кетиши, төвән қатламдики аммиға зор бесим пәйда қилғанлиқи инкас қилинған.