Малайшиядики чоң аммиви тәшкилатлар һөкүмәтни уйғур елидики зулумни сүрүштүрүшкә чақирмақта

Мухбиримиз ирадә
2019-04-02
Елхәт
Пикир
Share
Принт

Малайшиядики чоң аммиви тәшкилатлардин болған «йәршари тинчлиқ һәрикити» тәшкилати малайшия һөкүмитини уйғурларниң вәзийитигә көңүл бөлүшкә чақирди.

М с н хәвәрләр ториниң хәвәр қилишичә, мәзкур тәшкилатниң башлиқи ахмәд фәһми моһд самсудин мәхсус уйғурлар үчүн ечилған бир йиғинда малайшия, һиндонезийә вә бангладәш қатарлиқ дөләтләрдә бир қанчә қетимлиқ намайиш болғанни һесабқа алмиғанда мусулман дөләтлириниң уйғурлар мәсилисидә асасән сүкүттә қалғанлиқини билдүргән.

У, пәләстин вә сүрийә мәсилисидә қаттиқ инкас билдүрүп кәлгән мусулман дөләтлириниң уйғурларға кәлгәндә охшаш позитсийәни давам қилдуралмиғанлиқини тәнқидләп: «әлвәттә бу асан болмаслиқи мумкин, әмма биз бу һөкүмәтләр үчүн буни дипломатик йоллар арқилиқ ипадә қилидиған бир йол барлиқини билимиз» дегән. 

Хәвәрдә ейтилишичә, ислам һәмкарлиқ тәшкилатиниң малайшия мәслиһәтчиләр кеңиши малайшия һөкүмитини хитай билән уйғурларға қиливатқан муамилиси һәққидә сөһбәт өткүзүшкә чақирған. Мәзкур кеңәш рәиси әзми абдул хамид бу һәқтә елан қилған баянатида: «биз хитай билән болған дипломатик мунасивәтләргә әһмийәт беримиз, әмма у йәрдә бир зулум болуватқанлиқиму һәқиқәт. Биз һөкүмитимиздин бу мәсилидә бир һәрикәт қилишини тәләп қилимиз» дегән. 

Малайшия һөкүмити лагерлар мәсилисидә ипадә билдүргән тунҗи ислам дөлити болуп һесаблиниду. Малайшия парламент әзаси вә болғуси баш министир әнвәр ибраһим уйғур елидики лагер мәсилисиниң хитайниң ички иши әмәсликини билдүргән иди. 

Малайшия ташқи ишлар министири сәйфуддун абдуллаһ бу йилниң бешида қилған бир сөзидә һөкүмәтниң уйғурларниң вәзийитини йеқиндин көзитиватқанлиқини вә йүз бериватқан әһваллардин қаттиқ әндишилиниватқанлиқини ипадә қилиш билән биргә: «малайшия һөкүмитимиз өз позитсийәмизни йәниму очуқ қилип оттуриға қоюш тоғрисида давамлиқ издәнмәктимиз,» дегән иди.

Пикирләр (0)
Share
Толуқ бәт