Malayshiyadiki chong ammiwi teshkilatlar hökümetni Uyghur élidiki zulumni sürüshtürüshke chaqirmaqta

Muxbirimiz irade
2019-04-02
Élxet
Pikir
Share
Print

Malayshiyadiki chong ammiwi teshkilatlardin bolghan "Yershari tinchliq herikiti" teshkilati malayshiya hökümitini Uyghurlarning weziyitige köngül bölüshke chaqirdi.

M s n xewerler torining xewer qilishiche, mezkur teshkilatning bashliqi axmed fehmi mohd samsudin mexsus Uyghurlar üchün échilghan bir yighinda malayshiya, hindonéziye we ban'gladesh qatarliq döletlerde bir qanche qétimliq namayish bolghanni hésabqa almighanda musulman döletlirining Uyghurlar mesiliside asasen sükütte qalghanliqini bildürgen.

U, pelestin we süriye mesiliside qattiq inkas bildürüp kelgen musulman döletlirining Uyghurlargha kelgende oxshash pozitsiyeni dawam qilduralmighanliqini tenqidlep: "Elwette bu asan bolmasliqi mumkin, emma biz bu hökümetler üchün buni diplomatik yollar arqiliq ipade qilidighan bir yol barliqini bilimiz" dégen. 

Xewerde éytilishiche, islam hemkarliq teshkilatining malayshiya meslihetchiler kéngishi malayshiya hökümitini xitay bilen Uyghurlargha qiliwatqan mu'amilisi heqqide söhbet ötküzüshke chaqirghan. Mezkur kéngesh re'isi ezmi abdul xamid bu heqte élan qilghan bayanatida: "Biz xitay bilen bolghan diplomatik munasiwetlerge ehmiyet bérimiz, emma u yerde bir zulum boluwatqanliqimu heqiqet. Biz hökümitimizdin bu mesilide bir heriket qilishini telep qilimiz" dégen. 

Malayshiya hökümiti lagérlar mesiliside ipade bildürgen tunji islam döliti bolup hésablinidu. Malayshiya parlamént ezasi we bolghusi bash ministir enwer ibrahim Uyghur élidiki lagér mesilisining xitayning ichki ishi emeslikini bildürgen idi. 

Malayshiya tashqi ishlar ministiri seyfuddun abdullah bu yilning béshida qilghan bir sözide hökümetning Uyghurlarning weziyitini yéqindin közitiwatqanliqini we yüz bériwatqan ehwallardin qattiq endishiliniwatqanliqini ipade qilish bilen birge: "Malayshiya hökümitimiz öz pozitsiyemizni yenimu ochuq qilip otturigha qoyush toghrisida dawamliq izdenmektimiz," dégen idi.

Toluq bet