11 Neper Uyghur musapirining mesilisi malayshiya axbaratida munazire qozghighan

Muxbirimiz erkin
2018-02-16
Share

Malayshiyada tutulup qalghan 11 neper Uyghur musapirini xitaygha ötküzüp bérish-bermeslik mesilisi malayshiya axbarat wasitiliride küchlük munazire qozghighan. B b s ning xewer qilishiche, Uyghur musapirliri mesilisi malayshiya axbaratlirida keng xewer qilinip, ularni xitaygha qayturup bérishke qarshi pikirler peyda bolghan.

Yéqinda malayshiya da'irilirining xitay terep bilen Uyghur musapirlirining mesilisini sözlishiwatqanliqi ashkarilan'ghan. Bu xelq'ara jama'etning diqqitini qozghighan. Amérika hökümiti, xelq'ara kishilik hoquq teshkilatliri, malayshiya adwokatlar jem'iyiti qatarliq organlar arqa-arqidin bayanat élan qilip, malayshiya hökümitidin Uyghur musapirlirini qayturmasliqni telep qilghan. Bu heqte amérika hökümiti arqa-arqidin ikki qétim bayanat élan qilghan.

Malayshiyaning "Bügünki erkin malayshiya" namliq öktichi tori maqale élan qilip, xitay hökümiti "Uyghurlarni xitayning siyasitini qobul qilmighanliqi üchünla 'térrorchi' dep qarawatqan ehwalda", bu musapirlarni xitaygha ötküzüp bérishning "Kem eqilliq" bolidighanliqini bildürgen. Malayshiyaning bezi parlamént ezaliri, eger Uyghur musapirlar qayturup bérilgen teqdirde adaletsiz jazagha duch kélidighan ehwal bolsa, ularning xitaygha qayturulmaydighanliqini tekitligen.

Malayshiyadiki "Sinar xari'an" gézitining xewer qilishiche, malayshiya parlamént ezasi raja kamarul bahrinshah raja exmet, "Eger tutqunlar qayturup bérilse qattiq jazalinidu yaki adaletsiz sotlinidu dep qaralsa, ular uniwérsal adalet we kishilik hoquq asasida qoghdilidu. Bu ehwalda hökümet özining qararini xelq'ara adetler boyiche özgertidu," dégen.

Amérika hökümiti we xelq'ara kishilik hoquq teshkilatlirining ilgiri sürüshiche, eger Uyghur musapirliri xitaygha qayturup bérilse ularning ten jazasigha, adaletsiz mu'amilige uchrishi, hetta ölüm jazasigha höküm qilinishi yaki iz-déreksiz yoqap kétishi mumkin iken. Malayshiyaning hökümet axbarat agéntliqi ‏- "Bérama" ning bergen xewiride hökümetning téxi axirqi qararni chiqarmighanliqini bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet