Малайшиялиқ министир: «биз малайсияда панаһлиниватқан уйғурларни хитайға өткүзүп бәрмәймиз»

Мухбиримиз ирадә
2020-09-04
Share

Малайсия һәрқандақ бир уйғур мусапирни хитайға өткүзүп бәрмәйдиғанлиқи вә уларниң 3-бир дөләткә бихәтәр йәрлишишигә капаләтлик қилидиғанлиқини билдүргән.

Ройтерс агентлиқиниң бу һәқтики хәвиридин қариғанда, юқириқи сөзни малайсия һөкүмитиниң баш министирлиқ мәһкимисидики министир дәриҗилик әмәлдари моһид рәдзуан дегән. У: «әгәр һәрқандақ бир уйғур һаятий бихәтәрлики үчүн малайсияға қачқан болса, биз хитай һөкүмити уларни қайтуруп беришни тәләп қилған тәқдирдиму уларни қайтурмаслиқни қарар қилдуқ,» дегән.

Ройтерс агентлиқиниң ейтишичә, униң юқириқи бу сөзи малайсия парламентиниң тор бетидә елан қилинған икән. Гәрчә бу баянатниң қачан елан қилинғанлиқи ениқ болмисиму, әмма бу малайсия һөкүмитиниң тунҗи қетим уйғурлар мәсилисидә рәсмий йосунда ениқ позитсийәсини билдүрүши болуп һесаблинидикән.

Ройтирс агентлиқи бу һәқтә хитайниң куалалумпурдики баш әлчиханисиниң пикрини алмақчи болған болсиму, әмма җавабқа еришәлмигән.

2018-Йили өктәбирдә малайсия даирилири хитайниң күчлүк тәлипигә қаримай, 11 уйғурниң түркийәгә меңишиға рухсәт қилған иди. Әйни чағда хитай буниңдин қаттиқ нарази болғанда әйни вақиттики малайсия баш министири махатир муһәммәд қоюп берилгән бу уйғурларниң малайсияда «һечқандақ хаталиқ садир қилмиғанлиқи» ни билдүргән.

Малайсия уйғурларниң кәң көләмдә тутқун қилинип лагерларға қамилишиға қарита башқа мусулман дөләтләргә нисбәтән бир қәдәр күчлүк инкас қайтурған дөләт болуп һесаблиниду. Малайсиядики нурғун аммиви тәшкилатларму уйғурлар мәсилисигә зор әһмийәт бәргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.