Uyghurlar mesilisi malaysiya siyasiy saheside zor ghulghula qozghidi

Muxbirimiz eziz
2019-10-02
Share

Malaysiya bash ministiri muhemmed maxatir ötken hepte birleshken döletler teshkilati (b d t)diki kéngeshte Uyghurlarning zulumgha uchrishi heqqide pikir bayan qilip "Islam dunyasi bu mesilide süküt qiliwatidu. Chünki xitay bek qudretlik" dégenidi. Shuningdin kéyin uzun ötmey "Nyu-york waqti" géziti "Xitay dunyani lagérdiki musulmanlar mesiliside sükütke chömdürmekchi. Ular hazir ghelibe qilmaqta" témisida mexsus maqale élan qilip malaysiya hökümitining bu mesilidiki bezi pikrini ashkarilighanidi.

Maqalida xitay hökümiti bir qisim chet'el diplomatlirini Uyghurlar diyaridiki lagérlarni ékskursiye qilishqa teshkilligende malaysiyadin bir diplomatning barliqi alahide tekitlen'gen. Shundaqla uning sözliridin neqil keltürüp: "Qeshqer we xoten erwahlar shehirige aylinip qéliptu. Terbiyelesh merkizidiki oqughuchilarning chirayidin qorqunch we ghem-qayghu tökülüp turidu. Xitayning térrorluqqa qarshi turush hoquqi bar bolsimu emma bu hoquq Uyghurlargha xata we qanunsiz yosunda ishlitilgen" déyilidu.

2-Öktebir küni malaysiya tashqi ishlar ministiri "Nyu-york waqti" gézitining bu maqalisige qattiq naraziliq bildürdi hemde "Bu maqalida axbarat exlaqigha xilap qilmishlar orun alghan. Shundaqla ré'alliqni eks ettürmigen. Malayshiya bilen xitay otturisida nahayiti chongqur dostluq we öz'ara hörmet dawam qilmaqta" dégen.

Xuddi shu waqitta malaysiyadiki eng chong puqrawiy islam teshkilatliridin bolghan "Malaysiya musulman yashlar herikiti" bayanat élan qilip, malaysiya hökümitini Uyghurlar mesiliside béyjinggha qattiq turushqa chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet