Малайсияда тутуп турулуватқан 11 нәпәр уйғур әркинликкә чиқти

Мухбиримиз ирадә
2018-10-11
Елхәт
Пикир
Share
Принт

Малайсия һөкүмити малайсияда тутуп турулуватқан 11 нәпәр уйғур үстидики барлиқ әйибләшләрни бикар қилип уларни азад қилди. «Баңкок почтиси» гезитиниң хәвәр қилишичә, бу 11 нәпәр уйғур тутқун үстидики әйибнамиләр инсанпәрвәрлик нуқтисидин малайсия тәптиш әмәлдари тәрипидин бикар қилинған. Улар түрмидин қоюп берилгәндин кейин сәйшәнбә күни малайсиядин айрилип, сақ -саламәт һалда түркийәгә йетип кәлгән.

Малайсияда тутуп турулуватқан 11 нәпәр уйғур тутқун 4 йилниң алдида тайландта тутулуп қалған уйғур мусапирларниң бир қисми иди. Улар өткән йилниң ахири тайландтики бир түрмидин қечип, малайсия чеграси ичигә киргәндин кейин малайсия сақчилири тәрипидин тутқун қилинған вә малайсияда «чеградин қанунсиз кириш» җинайити билән әйибләнгән иди.

Америка қатарлиқ бир қисим ғәрб дөләтлири вә кишилик һоқуқ органлири малайсия һөкүмитигә чақириқ қилип, бу уйғурларниң хитайға қайтурулмаслиқи, уларниң үчинчи бир дөләткә саламәт орунлишишиға капаләтлик қилишини изчил һалда тәкитләп кәлгән. Малайсия даирилириниң хитай һөкүмитиниң бу һәқтики қаттиқ бесимиға қаримай, 11 нәпәр уйғурни азад қилиши пүтүн дунядики уйғур җамаитини вә һәрқайси кишилик һоқуқ паалийәтчилирини қаттиқ сөйүндүрди.

Кишилик һоқуқни көзитиш тәшкилатиниң асия ишлири директори софей речардсон твиттер арқилиқ билдүргән инкасида, «бу узундин буян биз аңлашқа тәшна болуватқан бир хош хәвәр иди» деди. Чәтәлләрдики уйғур көзәткүчиләр иҗтимаий таратқулар арқилиқ 11 нәпәр уйғурни азад қилған малайсия һөкүмити вә бу уйғурларға қучақ ачқан түркийә һөкүмитигә тәшәккүрини ипадиләшти.

«Баңкок почтиси» гезитиниң ейтишичә, уйғурларниң қоюп берилиши малайсияниң 93 яшлиқ баш министири маһатир муһәммәд хитайниң малайсияға салидиған 20 милярд долларлиқ қурулуш пиланини бикар қиливәткәндин кейинки йәнә бир қетимлиқ хитайни биарам қилидиған бир һәрикәт икән.

Пикирләр (0)
Share
Толуқ бәт