Malaysiyada tutup turuluwatqan 11 neper Uyghur erkinlikke chiqti

Muxbirimiz irade
2018-10-11
Élxet
Pikir
Share
Print

Malaysiya hökümiti malaysiyada tutup turuluwatqan 11 neper Uyghur üstidiki barliq eyibleshlerni bikar qilip ularni azad qildi. "Bangkok pochtisi" gézitining xewer qilishiche, bu 11 neper Uyghur tutqun üstidiki eyibnamiler insanperwerlik nuqtisidin malaysiya teptish emeldari teripidin bikar qilin'ghan. Ular türmidin qoyup bérilgendin kéyin seyshenbe küni malaysiyadin ayrilip, saq -salamet halda türkiyege yétip kelgen.

Malaysiyada tutup turuluwatqan 11 neper Uyghur tutqun 4 yilning aldida taylandta tutulup qalghan Uyghur musapirlarning bir qismi idi. Ular ötken yilning axiri taylandtiki bir türmidin qéchip, malaysiya chégrasi ichige kirgendin kéyin malaysiya saqchiliri teripidin tutqun qilin'ghan we malaysiyada "Chégradin qanunsiz kirish" jinayiti bilen eyiblen'gen idi.

Amérika qatarliq bir qisim gherb döletliri we kishilik hoquq organliri malaysiya hökümitige chaqiriq qilip, bu Uyghurlarning xitaygha qayturulmasliqi, ularning üchinchi bir döletke salamet orunlishishigha kapaletlik qilishini izchil halda tekitlep kelgen. Malaysiya da'irilirining xitay hökümitining bu heqtiki qattiq bésimigha qarimay, 11 neper Uyghurni azad qilishi pütün dunyadiki Uyghur jama'itini we herqaysi kishilik hoquq pa'aliyetchilirini qattiq söyündürdi.

Kishilik hoquqni közitish teshkilatining asiya ishliri diréktori soféy réchardson twittér arqiliq bildürgen inkasida, "Bu uzundin buyan biz anglashqa teshna boluwatqan bir xosh xewer idi" dédi. Chet'ellerdiki Uyghur közetküchiler ijtima'iy taratqular arqiliq 11 neper Uyghurni azad qilghan malaysiya hökümiti we bu Uyghurlargha quchaq achqan türkiye hökümitige teshekkürini ipadileshti.

"Bangkok pochtisi" gézitining éytishiche, Uyghurlarning qoyup bérilishi malaysiyaning 93 yashliq bash ministiri mahatir muhemmed xitayning malaysiyagha salidighan 20 milyard dollarliq qurulush pilanini bikar qiliwetkendin kéyinki yene bir qétimliq xitayni bi'aram qilidighan bir heriket iken.

Toluq bet