Хитай, малайсияниң 11 нәпәр уйғурни қайтуруп беришигә нарази болди

Мухбиримиз ирадә
2018-10-12
Share

Малайсия һөкүмитиниң тутқундики 11 нәпәр уйғур мусапирни қоюп берип түркийәгә йолға селиши хитай һөкүмитини қаттиқ биарам қилди.

Ройтерс агентлиқиниң бу һәқтики хәвиридин мәлум болушичә, җүмә күни хитай ташқи ишлар министирлиқи баянат елан қилип, малайсия һөкүмитиниң қарарини тәнқидлигән.

Баянатта малайсия һөкүмитиниң хитайниң уларни қайтуруп бериш һәққидики тәлипигә писәнт қилмиғанлиқи тилға елинип: "биз малайсия һөкүмитини бизниң бу һәқтики әндишилиримизгә көңүл бөлиду, дәп ойлиған идуқ. Бу кишиләр һәммиси хитай пуқраси иди. Биз уларниң үчинчи дөләткә әвәтилишигә қәтий қарши туримиз" дейилгән.

Малайсия һөкүмити хитай һөкүмитиниң 11 нәпәр уйғур мусапирни қайтуруп бериш һәққидики күчлүк тәлипигә қаримай, сотқа чиқишни күтүп турған бу уйғурлар үстидики барлиқ әйибнамиләрниң бикар қилип, уларни әркинликкә чиқарған иди. Уларниң әркинликкә чиқирилиши чәтәлләрдики уйғур җамаити вә кишилик һоқуқ органлирини қаттиқ сөйүндүргән.

Җүмә күни, дуня уйғур қурултийи бу һәқтә мәхсус баянат елан қилип, малайсия һөкүмитиниң қарарини қарши алди. Бирақ, дуня уйғур қурултийи рәиси долқун әйса қарарни қарши елиш билән биргә йәнә "тайланд вә малайсия қатарлиқ дөләтләр хитайниң зулумидин қутулуш үчүн бу дөләтләргә қечип кәлгән уйғур мусапирларни хәлқара мусапирлар қанунлириға бинаән бир тәрәп қилип, уларниң үчинчи дөләткә саламәт орунлишишиға капаләтлик қилиши керәк", дәп әскәртти.

Баянатта ейтилишичә, һазир тайландтики тутуп туруш орнида тайланд һөкүмитиниң қарарини күтүп ятқан 50 әтрапида уйғур бар болуп, бу уйғурларниң тутуп турулуш вақтиниң бундақ узун сүрүлүп кетиши хәлқарадики мунасивәтлик мусапирлар қанунлириға хилап икән.

Долқун әйса әпәнди сөзидә, һәрқайси һөкүмәт вә органларниң хитай һөкүмитиниң қаттиқ зиянкәшлик қилишиға учраватқан уйғур мусапирлар мәсилисигә алаһидә муамилә қилиши керәкликини билдүрүп, башқа дөләтләрму "германийә вә шиветсийәгә охшаш уйғур мусапирларни қайтурмаслиқ һәққидә қарар чиқириши керәк", дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт